تابلوه
ياسمين الشاذلي
عرفت تحب ولا ياصاحبي بتحاول
يادوب عاجباك
فقولت تكمل اللوحة
وعارف كل ألوانك فايتها لمين
فعمر الرسمة في حياتك
مايوم هتدوقها بالكامل
لكن برضه مايمنعش
يجيلك قلب وتحاول
انا برضه بحاول زيك
لكن قلبي ماهوش قادر
اقنعته يغمض عينه
قام شاف صورتك في الاخر
طمنته ان انت هتيجي
قاللي انا متطمن جدا
انا واثق حبيت راجل
طيب ما انا حقي اعيش
هافتح شباكي واجرب
أمد جسور للنور
لو يوجع قلبي غيابه
هارسم علي كتفي طيور
ومؤكد لما يغنوا
هو كمان يرسم سور
راح يرسوا طيوري عليه
وتكونلي واكونلك في تخاطر
وكفاية يكون رغم دا كله
ياحبيبي مابينا تواصل
حاول ياحبيبي
وانا هاحاول
