إعلان

الرئيسية » » رعشة | ياسمين الشاذلي

رعشة | ياسمين الشاذلي

Written By Unknown on السبت، 21 مارس 2015 | 8:23 ص


رعشة
ياسمين الشاذلي




أول ما الرعشة تجينى

يلبسنى حنينى

فقولك أهلاً

جاي متأخر ليه ؟

فترد بعينك سامحيني

الوقت بيسرق وبيقطع

وبينزف في البعد كتير

افتحلك إيدي

وتقرالي الحظ المتداري

وتقولي تعالي ننسى الموت

والموت اللى بينسانا ماجاش

لساه محبوس فى الناس

اللى بعيد عـ الأرض فى كوكب تاني

الموت اللى عرفناه

مابينساش غير نفسه

هو اللى بيعيش العمر ويفضل وحده...



***

الحظ لابس أقنعة

والرعشة ملياني بقلق

أوقات بيتلون فرح

أوقات بيتدارى فى ملامحك

خليك لابسني خليك حنين

خليك فى ذكرايا السنين الحلوة

والطعم اللى بيصبرني عـ الأحزان

خليك امبارح المسنود على وتدي

وبكرة اللى بيضحكلي

وخليني أكون منك تراتيلك

يا قرآن قلب طفلة بتحلم انك حبها الأوحد

وعزلة فكرها فيك وانت بيها تتمرد

تقول ايوة أنا كسبانة توقيتى

فى حضن عنيك.

يا زهرة وسط خيوط شبك

متقطعة والريحة فى إيدين اللى صاد

والأمل في الخاتم اللي في بطن سمكاية لقاك

خليك هناك...خلى الأمل من رعشتى

يجيبك فى أحلامى وبس

خلينى ضي

خليني فيك الورد وارويني بنظام

ولا يملا عيني

غير براويز القمر ويا الحصان

والبنت بتعد الليالى بالدقايق والثوانى

على بال ما يجى النجم يتعلق فى فستانها

براويز حقيقى ملخصة أحلام بشر

والمعجزة مش فى تعبير القصيدة

المعجزة فى عجزى عن التعبير

وقلمى صايم عن دموعى

والبوح ماهوش جنى وخلاص

البوح رصاص..لو طلقة طلعت

تختصر عمر الدموع

فى بحر دم يغرق الحساد

على إيه مداد الدم ولا الدمع ولا الميه

البحر مش فيه العروسة

جنية البحر الكدبة اللى مصدقينها

مهيش حقيقة

الحقيقة إني عاجزة إني ابوح لك

.............

التعليقات
0 التعليقات

0 comments:

إرسال تعليق

نبذة عنا

Restaurants

يتم التشغيل بواسطة Blogger.

Travelling Diaries

Entertainment

Technology

Restaurants

Travelling

Entertainment

Technology

تسمية 4