تابلوه
ياسمين الشاذلي
وشك فيه معاني بتهرب من بعض
وبترجع تاني تصالح بعض
خوفك بتواجهه ببوسة لقلبك
وبتحضن نفسك عالآخر
فتطبطب علي روحك بسيجارة
والناس بتشوفك
تابلوه
بتلم حنان الخلق بحالهم في عيونك
وعليك لحظات
تتبسم بكسوفك منهم
عارف يا....
أنا أول مرة أعدّى الشارع كانت في عنيك
من غير ما اعرف اسمك ايه
عديتني شوارع ياما
أول ما اتعرفت عليك
(أنا اسمي ....)
حسيت انك بيني وبينك
ماتقولش لحد
طريق سري
واني وصلت لأول سرداب
يااااه
سراديب الروح مابتتعدش
ومانوصلهاش بسهولة كدة
صورك كلها تابلوه فنان
يمكن علشان سر جمالها
انك رغم رقيك جدا
رغم غرورك جدا
بتبان أبسط انسان
.............................
