بلاش توب الملاك دلوقتى
أحمد سليمان
(1)
بتشوفها ملاك ع الأرض..
وبتشوفك بدقة شيطان
إزاى ما بينكم تطرح شجرة محبه؟
هى..
بتستنى طعم البرقوق م النخل
وانت عندك يقين ..
إن طرح الشتا هو النوى.
(2)
اسمحى لى..
أجرحنى بإيديكى عشان يوجع..
لكن بلاش تتألمى..
بلاش يترسم وشك بكا
هى نفس الإيد اللى بتداوى..
أكتر ايد تعرف تجرح
فبلاش توب الملاك دلوقت
جرحين كمان..
وابقى ارحلى من غير سلام.
(3)
أجمل كلمة حب..
بتقولها بعنيها..
بصبر الضحيه
وانت مستنيها واضحه زى جانى
العلاقه بين ميلاد قلبك..
وجرحها..
تتلخص فى كلمه
كلمه بتجر الجراح على قلوبكو..
تقدر فى ظرف تانى..
تكون بدايه للحياه
الصبر/ قاموس المستحيلات
فى شوقكم هو كل الحقايق
الفراق مسألة وقت
عمرك ما حليتها..
فى امتحان البوح
السكوت..
معاهدة سلام للحفاظ ع القرب
اللهفه..
بتحتاج مبرر
تحتاج تعود بالزمن
يعاندك
تحايله
تتلعن على هامش عينيها بالهوى
قلبك لغم المحبه
فتشتاق لك بحنين ورده
وتشتاق بقوّة حزام ناسف
من حقك..
ما تشوفش «قيس»..
ناسك فى حب «ليلى»
ومن حقها..
تشوف «جولييت»..
مجرد خداع بصرى
لمّا تتقابل عنيكو ف تلاجات الخوف
فتقرروا..
إن الحب ع القلب فرض عين
محرم ع الجوارح
وتكتفوا باختلاس الحب فى النظره
وان البوح منبعه قلوبكوا
مصبه للفراق.
