من سما سابعة
ياسمين الشاذلي
اسمك
بيرجف فيا أنفاسي
محتاج تفارق كام حبيب
تثبتلهم انك قوي وقاسي
محتاج تكسر كام مراية
وانزفك ياسمين في كاسي
لمحوك في عمق الصورة
بتعيط لوحدك
ازاى لوحدك
وانا وانت يوماتي عالمدي
فارشين قلوبنا نجوم
تأّذن بالبعاد فيّا
تدق الرفض أجراسي
وهي الصحرا بتعلّم فنون الجرح
مرار الطرح..
علمني السكوت والصبر
الكاس شرخ ايدي
دمي اللي سايل فيه
احمي من احتمال اداريه
قلبي
ماكانش مهيأ للرحيل والكفر
من يوميها كل يوم انده عليه
واقف علي المينا البعيدة
يستني فيك
مع كل طلعة فجر
مع كل طلعة فجر
بلمح شعاع منك
بيحنس القلب برجوع الطيف
الطيف عصاني لما ضميته
نثرني ضي وعود
انا قمت لميته
لملم ملامحي من ملامحك ليه
وديته فين عشقك
دانا اللي ياما وديته
ونسيت أوام الورد والمواعيد
ونسيت كلام اتقال في لمسة ايد
مين اللي قال ان السنة في البعد وقت
السنة في البعد عمر
والعمر كله يهون
ويفضل طيفه ونّاسي
لساه مصمم
يبقي ناكرني قصاد الخلق
وكل الخلق عرفوني في ملامحه
وواقفلي علي الغلطة
وكل مابيغلط قلبي يسامحه
ازاى اكون في الغرب وانت في شرق
وتشرّق قلبي بإاخلاصي
ليه زي المرايات بتفكر
بتودع مين فكر يهجر
وبكل بساطة بتنساهم
فين عهدك ليا بتقديسي
سوقت عليك السماوات سبعة
وعارفني انت أميرة وجدعة
صدقت إزاى اني عصيت
عمري ماقلبي انا كان فيك عاصي
