ضل ضي
ياسمين الشاذلي
وكأنهم ضيّين ودابو جوا بعض
وكأني ضلاية سمر
شبعانة من نورهم
وانا الجنين اللي اتولد
من نور مدد
بيونسك ضلين سند..
فاتولد ساعة الشروق
عنقود عنب بمذاذة البرقوق
تقطفني مرة تنتعش
ولما تبعد ترتعش
من الدفا قلبي اتنقش
فمفيش مقارنة بتحتويني
انا حبي شجرة بتنغرس
تكبر وتطرح طول طريق العمر ضل
ويحرسك ليا
نغزة علي الخدين
ضي نجمة بعيد/ بيقسمك نصين
يغسلك بالنور/يسكّنك رمشين.
هدوء الموجة ساعة ليل
وصوت المية والترتيل
ومحتاجة لقلب جريء مابيخافش
ويتحدى عشاني الكون
ما احبش يوم اشوف الخوف
شعاع في عنيك
ما احبش تبقي ويايا وحامل هم ناس تانيين
وانا علشان عيونك كل دا شايلاه
وبقول لنفسي :
طعمي اكيد جواه
لكن روحي اللي زعلانة
بتدبل تحت ضغط خريف
مصّر يكرر الاحداث
غرقت في روحي ياحبيبي
في بحرك قلبي حتة ماس
.
.
.
بعزف معاك مقطوعة موسيقية
اى انفصال في اللحن
بيشتت الاحساس
ازاى بتقدر وانت حاببني
تنكرني قصاد الناس.
