طريقين
ياسمين الشاذلي
طريقين
وبتحامي في حيطان بيتنا من التيار
واجري عليك الاقي الدمع
في عيوني بقي انهار
يسيل علي قلبك القاسي مايرحمنيش
الاقي الغربة رسماني في كف ايديها بالكرباج
وحاوطني طوبات م الشك تبني جدار
يمثل سد بين قلبك وبين قلبي ولا تحتار
في انك لسة عايزني
ورغم القلب قايد نار
أنا اخضعلك
ومااملكش عشانك حاجة جوايا
مجرد ذكري أو أفكار
لكنه بحق حبيب عمري وأوقاتي
وأجمل عزف علي أوتار
مشاعري وحبي وحياتي
أنا أنساه..
دنا انسي كل شيء فيا وأكون فاكراه
دنا رافضة الحياه اكمني مش وياه
دنا لو عشت الفين عمر علي عمري
أدوم بهواه واقول الاه
مش شوقي وانا عايزاه
يخضب ارضي يزرعها بنات م الحور
يكبرها تقول بابا
وتندهني وتبدر فيا ضي ضياه
ماحبيتش ولا ينفع أحب في يوم
حبيب الاه
وهو وعدني في الغنوة
هشوفه هناك
افضل اعيد في الحانه
واحفظ قلبي في كلامه
واحب غناه
ماتستغربش ماهو كمان بيعشقني
ولو سألوه عن الاحلام وعن بكرة هتلقاني انا اللي مناه
لكنه زماننا بغرابته
حلف ليشقنا طريقين
طريق يمشي حبيبي فيه
عشان يلقاني مش لقياه
طريق تاني أشوفك فيه
فتلقاني ببص عليه وقلبي معلقه بذكراه
فسامحني
دي غلطة أكيد من التوقيت
ماتسمحش لشموعنا تقيد
وتطفيها شفايف تانية حسادة
ومن إحساسنا منكادة
تعالي نجرب التبديل
وهات حلمك وغنواتك بدل أحلامي أنا وياه
وخد أملي وإصراري بدل يأسك ولا ترضاه
هيجي اليوم ونتجمع في جنة خلد عند الله
فيختارني يلاقيني معاك انت
عشان انت اللي شاريني وانا بايعاه
يناجي ربنا ويقول دي كات ملكي
يرد الله بان الحق لأصحابه
لكن أصحابه لو خانوا مايستاهلوش يكونوا معاه
فيديله حبيبة زمان حلم بيها
وكان هو بطلها في كل أغانيها
ولما لقاها بتخونه وبتحب اللي كان صاحبه
وحبيته فضل شاكك في إحساسي
ويسأل كل من شافني
علي أخلاقي أو ناسي
ولما تأكد الأستاذ باني بحبه هو وبس
خلاص كان عدي كل الوقت
وجيت انت
لقيتك قصر من فضة
أنا أول وآخر حد من سكناه
سرقت القلب من نظرة
بصدق الحب في عيونك
وأول مرة أتنازل عن المبدأ
عرفت معاك مباديء تانية مش وياه.
