الحب بيبرر حاجات
ياسمين الشاذلي
الحب بيبرر حاجات احتمالها معجزات
ياأيها الشابك في الضل
الساقط علي قلبك من رمشي
لما انت هتتوحد بالمجهول
ومصمم تبقي كيان وهمي
بتنادي فيا بقوتك من بدري ليه
ولما اقرب تختفي
انا ذنبي ايه اني ....
الكلمة ابسط من اللي جوايا وعارفه ان انت عارف
يوماتي بلبس ماسك برود
ولو ماليني الاحتياج بضحك
وانا روحي رايحه للنفس الحر في هواك
انا المعبد اللي سكنته من قبل الميلاد
اديت فيه النوافل والفروض رغم البعاد
اتهد المعبد والجدران شايلاك
وعاد الورد من تاني لوحده
عشمان في لمسة طبطة
في ملوحة البحر البعيد
او في الرماد
فيتولد حزني ساعات
بريحة الموت
وساعات بريحة البحر
وكتير بريحة النار
حلفت مانيش هجيب سيرتك
لا في كلامي ولا في كتبي ولا في شعري
لقيتك اصل كل الكون
وضل في كل صوري ولون
وراقد ع الورق تمثال
بطل سحري عليك امتي
عصايتك كرهت التدليل علي صدري
وعجزك حجمك خالص
والحبل الملفوف علي جسم السما مربوط جدا
يلف بيا الزمن
وانت تاج قلبي
جسمي من حبك واجعني
شربت ملامحي كل ذرة شوق وهجر
ريحتك مطبوعة في تفاصيلي
والبس لك لون السما فستان
نجوم
يشف احلامي
وهسيبلك التنفيذ
وتلبس بدلة لون النيل
عشان لو مت بعد الفجر
تعدي مراكب العشاق
ملفوفه ف ورق بردي
تطل م البرواز
ايديك ملفوفه علي وسطي
لابس بدلة لون السما
وانا لابسة الفستان النيل
ياهل تري
تبادل الادوار قرب النهاية
بيفرق في القرار؟
طفل
وبالنهار شايب
وساعة الاكل زى ساعة النوم
ولا مجال للاختلااف
الحب بيبرر حاجات احتمالها معجزات
