إعلان

الرئيسية » » حلم القمر | ياسمين الشاذلي

حلم القمر | ياسمين الشاذلي

Written By Unknown on الأحد، 1 مارس 2015 | 6:14 ص


حلم القمر
ياسمين الشاذلي


متلفقة الأحلام معاك

مشنوقة آهة المحتاج على بابها

متلتمة بشارة من سواد حالك

فتتحشرج دموع صوتي

واغنّي جرحي ع الأوتار

واسيب الماضي يعزفلي

وسيبت عنيه بتتكلم وتندهلي

مجروح صوت الوتر فيّا

ومنزوع الكلام مني 

ورافضة اني ابيّنله

حنيني المستخبي عليه

فأشرح حال محبيني

وأعمل نفسي مش شايفاه

يتدارى ف دموع عيني

ويتمنى يقولي ألقاه

وأتمناه يكون منديل

يجفف دمعتي الغارقة

ويمحي قساوتي وجمودي

وغيمة صمت لابسانا 

أنا وهو

غرورى مترزاه في الشال

بماس فالصو..

لا يستاهل عليه أبقى 

ولا يفضل على عرشه

ولا ينزل هلالي العالي من فوقه

على رُكَبه..

ويخضع له

و دا انت اللي شاريلي الشال

غلطت ف يوم وذوقته

وقدّرته بغير قدره

وضل طريقه لمشاعري

وكيف يبقي علي حاله

ياصاحب المال ومحتاله

غرامي مستحيل تبنيه

عشان غشيتني في اساسه

ولو تبنيه بروج عالية

في قلب الوهم 

ماتقدر يوم على تمنه

دا هو حبيب زمان واحد

قابلته في مرة بالصدفة

صحّى فيا احساسي

حسسني أني ليا كيان

وفجأة لقيته بيهاجر

بدون حسبان

وخد كل اللي من ريحته

منديله اللي ياما فرشته ع الرملة

وِكَلنا عليه

ومرة لمسته بخدودى

وقلت أخبي فيه حبي

أكيد هيفكره بيا

لكنه لو نسي حتى

هيفضل مسكنه قلبي

ولو بات ألف ليلة ويوم

هألّف ألف حدوتة 

لحد ماييجي

في غيابه تونسني

وأحفظها لأولادي

يجوز وانا عايشة ينساني

لكن لو مت يرجعلي

يلاقي عيالي عارفينه

ولا كانشِ بطل وهمي

ويحكوله كلام عمري

وذوباني في بعده وفي الغرام اللي

ملاني معاه يااااااااااااه

نسجته صحيح في أحلامي

وحتى الحلم أخده معاه

خطوط كفي اللي

حافظة ملمسه بتبكي

وحشها بكل تفاصيله

وامتى خيالي هيجيله

وهل ينفع تحفظني معاك حاجة

ولو ينفع .. ياريت تقدر

ترجع حلمنا المسروق

بأني أفوق وأرجع تاني م الأول

مشاعري البكر تناديلك

وأهديلك علبة قطيفة مقفولة

وجواها جواهر لسة ماتلطتش

وسميها علي اسمك

وخليها مقاس جسمك

وزيّن بيها شقتنا

ولا تنساش تعلق اسمي

في ميدالية مفاتيحك

وعيد أحلامي م الأول

دا لو ينفع ..

وجاني ف يوم

فكّرني انه كان انسان مقدرنيش

وقطع صوره وكلامه

وقفّل بابنا قدامه

ولو كان حلمي يومها معاه

في بيت مسكون بأحلامه

ماتسمعنيش

وخد ايدي لجزيرة بعيد

وعلمني اكون وياك

يجوز احلم بنفسي هناك

هديتك كل احزاني

هديتني كتير بطوق الفل

صبرت عليا ولقيتني بدأت امِّل

وصرخة تهز اركان المكان فجأة

أفوق م الحلم

أفتح عيني ع الشباك

ألاقي ان السما صامتة وقمرك بدر

فتوحشني يجوز م البرد

ويحلم قمري بوجودك وينسى الغدر

ويحلم تاني برجوعك في نور الصبح

ويتمناك ولو صورة في ضوء الفجر.



التعليقات
0 التعليقات

0 comments:

إرسال تعليق

نبذة عنا

Restaurants

يتم التشغيل بواسطة Blogger.

Travelling Diaries

Entertainment

Technology

Restaurants

Travelling

Entertainment

Technology

تسمية 4