ياللى بكيت
ف العتمة دقت فيك
ايه اللى شنقك
غير ضفاير شقرا ضمها الانسان
عيون واسعة
بوسع بحيرة سكرانة
رميت نفسى ف حناها , عشقت
كتاف ناجيين من التوهان
شفايف قلبك السكران بتعصرنى
برود الجمر ف عيونى
منع اسمك يشيلنى ف الشجر مسافات
عروق بيضا بعرض البحر
حنين العصفورين للفجر
لحبة زقزقات شهوة
تبادل ف الغنا و الصمت
سكاتك كان شروع ف جريمة حسية
غنايا اكتشفها
وضلعى اللى انكسر جواكى مكشفهاش
غناكى شحيح أوى ليا
لدرجة ان اللحن علمنى
اخبى النوتة عن أوطان مبتزوريهاش
شوارع روحك الملحانة بتخونى
تخبى ف الوريد ادم
وانا اول بنى ادم يتوه فيكى
بنبض السكة والاوقات
انا فاضل يدوب اسمع اسامى الناس
اغنيها
ضلوع الناس بتهرب ليه
وانا بنطق اساميها
انا ضلع واحد قادر انه يشدنى
وانتى الضلوع كلها عجزت تنام فيكِ
والشيبة بنت السما متقسمة لطابورين
لو هرتعش
ولا ميت غطا هيلمنى
يكفينى بس اعرف
طريقنا منين
#
أحمد عثمان
