فى البدء خلق الإله أول موسيقى للملايكة
عملوا الملايكة بعدها النغمات
أهدوها للعاشقين هناك .. ع الارض
رقصت خيوط بيتهوفن الخرسا
و اتمددت أطراف بليغ
الملايكة وقتها
عزفت موسيقى الممكنات
الملايكة .. ألفوا تتر النهاية
بس لسة ماتعزفش
______
بين خيوط الفجر
و بزوغ الظلام
ألف غنوة بألف حالة و ألف حال
___
يا أيها الطيب أوى
أرسل سكونك
م السما لأجل ما يحن الغريب للأسئلة
و لأجل ما يعود الوسَع للأرض
____________________________
فى المبتدا
كات كل خطوات الشوارع
ملهمة للمبدعين
كان آدم الماشى فـ حوارى السيدة
سامع صراخ هايبل كمزيكا لـ "موزارت"
"نوح" اللى صيَّف كام سنة فى قلب الطوفان
كان واثق ان الشمس راجعة بقلب شاب
و قوس قزح مُبهج
ثم يوسف
ثم بطرس
ثم خالد
و ابن رشد
و كارل ماركس
ثم كل الحالمين
ثم ناسها الطيبين
الغناوى ...
اللى ياما إتلحنت
بين المضاجع ..و الشوارع .. و البيوت
_______________________
يا أيها الناس اللى هما ... طيبين
إحلموا بأجمل مكان
و إرسموه ع الارض بينَّا
لو مستحيل...
فكفاية نحلم
و نعلم الارض ماتبطلش يوم دوران
و نعلم الاطفال جمال العشق و اللمة
أرجوكو كونوا زى ما انتوا
و إحلموا
و ادونا طاقة نعيش هنا
و إستمروا كتير أوى
و إياكو مرة تكتبواو
آخر غناوى الطيبين
