عم عبـ فناح سوكارنو
شفتوا بوزه ؟ .. شفتوا قرنه
هوا مين يقدر يقارنه بأى حد
الرئيس مش زى حد
أى حد يقول لحد يروح لحد
يشوفوا حد
كل حد مراقبه حد
هوا يعنى جوز أم حد ؟
الرئيس شئنا وأبينا
بانتخاب أو بانقلاب أو بالتهاب او بانسحاب
بالسلاح أو بالسفاح أو بالنكاح أو بانشكاج تانت انشراح
بالسياسه وبالسلاسه وبالغلاسه وبالنجاسه
هوا مين يقدر يشيل كرسى الرئاسه ؟
إلا حد تكون مشفتش زيه حد
الزعيم أبو بدله كاكى
نور عنينا يقوم يكاكى
ف الخطب يبقى إشتراكى
ف القصور بيكون ملك
ف المراسم والطلاسم والمحمر والمقمر
اللى دمر عقل شعبه
واللى شيلنا ف متاعبه
واللى عمره ما شال همومنا
واللى بيزود سمومنا
واللى ضيع نص يومنا
ع الكلام والهمبكات
حلقاتنا وبرجالاتنا
ثوره نفيدها بحياتنا
يشترى الإخوان سكاتنا
يشترى العسكر خضوعنا
يشترى الحكام دموعنا ف كل مره
كل يوم وهلم جره
شعب بيلف المجره
ع الرغيف واللقمه حاف
شعب نام من غير لحاف
لما فتح عينه شاف
بس خاف م اللقطه كامله
شعب أدمن سوء معامله
شعب سف وكح رمله
بس حب الإنبطاح
يا بلادى
لمى قلبى من الجراح
لمى أحلام الميدان
لمى م الفجر الادان
كل مره بموت بموت عليكى
بس باردو بكون مدان
