سبحان
من ولع فيا الجمر وسابنى
من شد الغيبة ف حضنى بدون ما اعرفها
من علق ايدى فى قلبى وعلق قلبى بـ ايده
من لم كتاف الدنيا ف حضنه وسابهم يتعاركوا
من قال لحبيبتى انها تنسانى
من قالى انها هتعاود تانى
من علمنى انى لوحدى ف هذى الدنيا
برضو لانى ف اخر وقتى هبقى لوحدى
كنت بشوف الناس شبابيك
بتمطر عصافير ف الطل
كنت بلم ضلوعى فقلب عيال سكرانة
زرعوا الدم ف عرض الشارع
شرقان والبنت الشقيانة
عماله تلم خيوط و ترَبَط ف غناوى
وتمد ضلوع من صدرى لجوفها
جسمها بيفك التعاشيق
والدم ف عينى اتحول بنت لوحديها
شهوانى وضفايرها براح
من جرائتها
شدت منى ضلوعى ونامت فيها
شدوا ف جيبها الحكايات
كسروا ف نومها الشبابيك
جسم البنت لجسمى شريك
وانا واقف مصلوب سرحان
راسمة العفاريت على ورق الحيط
وعينيها بتضحك دخان
و المدبح مفتوح على روحها
مستنى القربان
والضى حزين ملهوش بستان
يهيطرح شجر البنى ادمين
ييلم الشيبة على الجدران
فيخافوا البنى ادمين م الجان
يتغير تكوين الانسان
عواجيز
و قيود
وشعاير موت بتقيد اى سجود
وعيال راسمين بالصوت ضحكات
مجروحة الايد اللى هتتمد ف خطاويهم
و تفك الضمة عن السكنات
ملعونة البنت العريانة و لحد الضهر
محنية بضهرها للاوقات
بتشد براءة من المجهول
و تقابل ادم ف حيطانها بعد الشهوات
سبحان الاتى و بعد الات
فى الغيب حكايات من غير نهايات
معلومة لرب الموت و الفرض
و انا فرضا يعنى لو اتأخرت ومفهمتش
ممنوعة الاخرة من الجزاءات
ممنوعة الموتة من السكرات
ممنوع الحب على الاسفلت
ممنوع الحضن عن الاموات
أوقات بيجينى المر سفر
و كتير بتجيبلى الفرقة سكات
#
تسابيح
لـ أحمد عثمان
