مختلفة عن كُل البنات
..
هو انتي ليه
بتعاندي كل الذكريات
بتفتحي عيون اللي فات
بتحركي جوايا شئ .. انا كنت فاكرُه تاه و مات
..
..
" انا كل بنت قابلتها
كت كرهتني ف شئ جميل
و كل بنت عشقتها
و عملت ليها المستحيل .. علشان تطيب
كت تيجي ف الآخِر تغيب
و تقول خلاص .. محناش لبعض
كت تدي وعد
اننا هنبقى صُحاب
و يومين تلاتة و يتبني سد الغياب
أنا حد داب
ف عيون حبيبته السهرانين
قضى السنين
ناسك ف ملكوت حُبَّها
عاشق لترتيل إسمَها
دايب ف جنة حُسنَها
و ف ضي هالات الجبين
لكن ككل المعشوقات
الكاذبات .. الخادعات
بِعدِت - و ده طبع البنات -
و بدون سبب .. "
..
..
هو انتي ليه ..
مش بجناحات
و مبتطيريش فوق ف السما
إزاي ملاك زيك يعيش .. وسط البشر
وسط الوشوش المُبهمة
..
..
" و ف يوم ما شفتك
كان القمر .. نايم ف أحضان السحاب
و الدنيا فتحت الف باب
و دخلت انا و إنتي لفانتازيا الجمال
ضي النجوم .. صوت المطر .. و قرنفلة و حلم و نايات
- "الليلة ف عيونِك نبات ؟! "
أحلي ما فيكي .. ضحكتك وقت الكسوف
و إبتسامتك ف السُكات
كتفِك .. و شعرِك .. و حَبَّات الندى
قلبي إهتدى
آمَن خلاص .. بالمعجزات "
..
..
و عاندتي كُل الذكريات
فتحتي شبابيك اللي فات
حركتي من جوايا شئ .. أنا كُنت فاكرُه تاه و مات
هو إنتي ليه ..
مختلفة عن كُل البنات .. :)
♥
