ضلوع "دولسين" الضعيفة
أحمد عثمان
سارحه يا بنت الجرح متغطى
شدى قلوعك ع الضلوع غطيه
انتى اللى مهما ضلوعى بتوطى
تتنى سكاتك للسما الغنوات
واقف ومتنى للوجع !!
عربيد
شارب نبيت الصبح ف الفلوات
لو رافعه راسك للدعا
وطى
انتى اللى اصلك ف الشجن مقامات
واسقينى من كتف النبى الصالح
دم العطاشى للوريد والموت
صالح و رافض للملا يصالح
رغم إن موته وسمه كات لقيود
لو جسمى فار ب العتمة واتصالح
كل البشر بيعيشو مزيكا
وانتى لوحدك بتعيشى بعد الموت
على عرش "دولسين" النبية
شق الصبي من ضلعها الطواحين
فاتبرعو ب الدم للملكوت
وحدك وقفتى و فارده روحى شراع
وحدك رأيتى البحر كان أسفلت
و كيخوت بيتخبى ف ضله بالانحنا
والبنت تايهه ف الطريق للوِرد
سارحة بتعزف ع الشجر و الناى
الروح بترقص للسكات الجاى
و العزف سارح ع الطريق تأويل
شارد بضحكة دوقت فيها الضى
أنا قلبى شرباه البشر حكايات
عطش الوريد
ف استنجدوا ب الحى
إن شق قلبى النور توابيته
و ان دق روحه الباب حواديته
و إن عشموك يا زمن
إوعاك بلاش الصبر
فاردة يا بنت الضهر
كل الشموس ع العين
وحدك مغطية كعب العيال ف الفجر
القلب حب الهجر
للتبة والتايهين
للموتة و التضمين
من امتى كانوا البشر بيعلموني الضحك
عملولي قلبي حجاب
بس الغنا كداب
شعبطت ف الاحباب
منعو عليا الضى
