الغانية
أحمد عثمان
هو ليه القلب شقشق
لما شق الصبح فيه
انتى كنتى غريبة جدا
زي طبع النداهات
كان صراخك
واجع العمر لساعات
كان بيرحل قلبى ليكى
وانتى واقفة
كنت بسمع اسمى منك
برتعش
كان طريقك ف الوريد
فتحة على إسمى الوحيد
"أحمَد"
وبحمَد ربنا
ان الجنون شارع
وان الشوارع
عدت سكات المقصلة
انتى الحقيقة مأصلة
و انتى العيال المرعوبين
من وشم على صدر الجنين
هى ليه التوهه مش أصل السكون
ازاى يا تايهين تصرخوا
ازاى يا"جازية" تحنى ضهر الاسمرانى
شى الله يا شيخة للغوانى
دا الموت عليل والقلب حابب يصطفيه
اااه ياليل
اااه يا سارقة منى ليل مليان كمان
قلبك الشفاف ما فسرلى الكلام
لما بنعس فوق جبين الشنق
بياخدنى المنام
بحلم إن العزف عالمرمر محال
حتى طعم الموج بدون ريقك ما سال
مانتى سلسال الحكاية
وانتى مرسال السما
قلبك الشقيان نما
من بين الضلوع الشيبة عافر
إنما
الكون بيعجز عن فطامه
شدى عالليل العيال
الصوت بينده اسمى على طول الشطوط
وانتى غايبة عن الوجود
طب مين بينده
يا مزيفين صوتها افهموا
هيا الحقيقة
وانتوا اصل التأويلات
الغيبة شدت فوق ضلوعى المعجزات
بصيت من الشباك
شردت
هي مين فيهم شريدة و صالبة طولها
ومين ف قلبى بتنحنى
شديت عليا صوتها
لكن
قلبى كان شارب نبيت
فكيت ضلوعى ف حضنها
القلب صلى وهيا لسه بتنحنى
لميت بواقى قلبها السكران سكات
وسألت نفسى عن حلول للمعضلة
هيا ليه الشمس لما بتتنى
تجمع عيال الارض من وسط السما
