غجرية
أحمد عثمان
فيروز
فضلت اشنق سكاتى كتير على وريدك
وادور ف الشمس
تحنينى
واشد عيونى على خصرك
يميل جزعك
ف يرقينى
لكن مقدرش اسيب جلدك بيسألنى
واتَوِه ف الكلام عمداً
لحد ما قلبى يرمينى
لاخر سكة العميان
بحور التوبة مفتوحة
وانا فاشل فى فن العوم
شفايفك
بنت غجرية بتندهلى
صوابع ايدك الساقعة
بدون ما المس طراطيفهم
يادوب بتشاورى على قلبى اللى كان عريان
مشاعرى بس تتجمد
قلوع البرد ف السكة
كما الشرايين
ف ساعة شوق بتتجلد
لوحدك واقفة محنية
وانا رافع حدود الشيب على ضلوعى
سكاتك غطّا ع السكة
طريق البحر كان فاضى
يدوب انسان
شفايف بنت غجريه بتندهله
وتجرى للوريد ساكنه
تلف اللفة وتعيدها
يزيد البحر من ناسه
طريق البحر مش فاضى
عروش المد بتساعد ضلوع الجذر
وانا و فيروز بنبكى ع اللقا والهجر
تغنى , ضلوعى تكتمنى ف مسمعشى
اقول الشعر تهجرنى
خلاص يابنى
فضلت اشنق سكاتها كتير على وريدى
ومتعبتش
