فكرت اكتب قصيدة
ناظم نور الدين
فكرت أكتب قصيدة
عن حاجة تكون جديدة
فكرت ف كل حاجة
القريبة والبعيدة
فكرت ف زحمة لكن
حواليها كتير مساكن
وعيال ف الزحمة تجري
وواحد على جنب راكن
فكرت ف بيت وحارة
وبنات حلوة وقمارى
وواحد ع النيل بيفكر
قاعد ومولع سيجارة
ف عشة أو بيت أو عمارة
وناس راضية بحالها
لو حتى ع الحديدة
فكرت ف فيلم سيما
حب وكراكيب قديمة
وحسن لو ما اتقتلشي
كات أيه تعمل نعيمة
فكرت ف نور جوامع
وف أجراس الكنيسة
شارع فرحان وشارع
ناسه عايشين ف حوسة
وف الفساد والكوسة
وعلاقة حب ناجحة
ونهاية تكون سعيدة
ف الوضع الأقتصادي
ف صيغة لنشيد بلادي
وف ناس الدرب الأحمر
وكمان ناس المعادي
فكرت ف مشربية
ووراها عيون شقية
في مجند بيستخبى
م الشرطة العسكرية
في ناس قطعوا عنها المية
ف ليالي حب حمرا
في شقق مصر الجديدة
فكرت ف الشوارع
والمدارس والبيوت
في عقول ف الدنيا ماشية
ومن فوقيها العنكبوت
فكرت ف الثقافة
والمعارف والعلوم
في بلدنا
" البط يقوم
فرحان م النوم يغطس ويعوم "
والدنيا هايلة جدا
والأكل والهدوم
بقينا نجيبهم من برة
وبقينا علية قوم
ف الأهلي والزمالك
وقانون حقوق الملك
يا منجي م المهالك
نجنا من وقعة سودة
ف نكسة قطر الصعيد
وحريق قصر الثقافة
وف ماضينا المجيد
ف حاضر مليان سخافة
ف فلسطين والعراق
وف لبنان والجولان
ومشاكل الشرق الأوسط
وسياسة الأمريكان
ف عبارة السلام
وقضايا الرأي العام
في بلاوي الأمن بتاعنا
ومصادرة الأقلام
فكرت ف كل حاجة
وما سيبتش أي حاجة
إن كانت حاجة ضخمة
أو حاجة ف غاية السذاجة
ولما ما وصلتش لحاجة
قومت وسيبت الورقة بيضا
