دعاء ركوب مصر
ناظم نور الدين
سبحان الذي سخر لنا مصر
وما كنا لها حاكمين
سبحان المجلس الأعلى
الرصين
لو قال شمال
كل الكلاب بتروح شمال
وإن راح يمين
كل اللي بايعين القضية بالرخيص
سبقم يمين
حتى الغلابة المغلوبين على امرهم
موطيين ومرصوصين
جوة الصفوف
للمجلس الأعلى الرصين
يبقى أحنا شئنا أو أبينا
كلنا مع الرصين
يا مجلس العسكر
مصر مش عضمة تشوفوها
تتهطلوا
ده الشعب بات يسكر
م الظلم ستين سنة
وأنتوا اللي تتسطلوا
يا موضة العسكر
في دولة الأمنيات
كل الموضات بطلوا
يا مجلس الأصنام
أصنامكوا من عجوة
الشعب اذا كفر م الجوع
هياكلكوا
لو كنتوا ف السكنات
متخبيين جوة
حقك
فارسها وقع
وجواده ليه كبوة
وان كنت عامل أسد
على المعيز والغنم
مصر مش لبوة
يا مجلس العسكر
جيشنا ده مش جيشك
ولو اترسم ميت ألف أمر
هتنطقه جحوشك
ولو اتغابيت وقت اللزوم
هو اللي هيحوشك
الجيش ما يضربشي ف ابوه وامه
احنا اللي من دمه
واحنا اللي بنهمه
يا مجلس الطراطير
الشعب طول عمره الكبير
يا كبير السن هرتل بقى وخرف
يا بقيت زبالة النظام
دورك قريب ع الصف
صف اللي رايحين طرة
يا مجلس المسخرة
والغش والافترا
متختلفوش كتير عن الشرطة
ومنختلفش كتير عن اللي كنا عليه
في مطلع الثورة
مهمناش الرصاص
مين اللي فينا جري
ميهزناش ميت صباع
من قبضة الفنجري
يا مجلس المماليك
الملك للمالك
يا شاغلنا بالاخوان
وكلام سلف خرفان
وحابسنا بالمجان
بين أهلي وزمالك
يا مجلس اتهالك
جاي من نظام هالك
ماشي ف طريق عوجان
واحنا اللي ف السالك
الحج مش ف البنتاجون يا عنان
والحكم مبقاش بالصدفة زي زمان
مش زي ما الامر كان
تبوس ايدين الامريكان
وتوطي للندل الجبان
علشان نوطيلك
عمر البلد دي
سبع تلاف سنة
محكومة م العسكر وم الخصيان
وم الاغراب
ولسه فيه كام الف كلب
مستنيين ع الباب
مستنيين فرعون جديد
وقت البلا يسيبهم
يكون قوي حبيبهم
يمد انابيب غازه
بالخير لانابيبهم
يخرب بيوتنا كلنا
لجل اما تعمر
تل ابيبهم
ويوصل النيل خراطيمه ترويهم
واحنا نموت م العطش والجوع
يا عشق كان ممنوع
لمصر
جه اوانك تطلع بجد
دول موتوك م الجوع
وبالسرطان
يا مجلس الخرفان
شايل عجوز خرفان
جاي من نظام فسدان
نظام عميل وجبان
ومدان ف كل ميدان
للانسانية
وكرامة الانسان
يا مصر محناش بقر
علشان يغمونا
وف ساقية الأوجاع ندور
علشان غيطانهم حبها
يملا الجيوب بالخير
واحنا عشانا ابتسامة
وامنية ببكرة
وتصبحوا على خير
ما ياما عشتي تعذبينا
آن الأوان تتعزي بينا
مش كنتي حطانا ف الهامش
في حواشي حواشيكي
ورميتي نفسك ف حضن الحاشية تأذيكي
طلعنا أجمل لحن فيكي
هتفضلي طول حياتك
تعزفينا
إحنا اللي كنا القوت اللي صلب حيلك
من قبل ما تندهي بنهم ونجيلك
من صوت وجعنا بيكي
دايما نغنيلك
في عز ما كنتي بتهدينا
كنا بنبنيلك
نعليلك
على كتافنا نشيل الهم
ونشيلك ف نني العين
رغم المرار ف الحلوق
سكنا مواويلك
يا جيشنا يا جيش مصر
ياللي انت عيشت الهزيمة
وعرفت طعم النصر
أخوك هناك ف الميدان
اضرب لو كان دمك رخيص
وبعنا لمجلس الخسة والتدليس
فيه كفتين وكفتنا خسرانة
لا احنا مع اسرائيل
ولا الامريكان معانا
يا خير جند الأرض
متطمعوش ف الأرض
طول عمر اسلحتك عيونها على برة
اوعى تغير مسارها وتبص على أهلك
لو بعتهم تهلك
وانت يا مجلس عسس
ميهمناش الحرس
ولا جبن جواسيسك
تنزل معانا الميدان
تلعب باسم الله
الخالق المعبود
ترفع علم آل سعود
وتطلق الإخوان
وسلف تلف تلفان
عمر البلد دي ما تبقى
ف يوم شبه طالبان
لو كنت فعلا مصلحة الوطن هماك
قاعد عشان تحميها
امشي وسيبها وخد الباب وراك
وسيبنا نبنيها
