سيدنا طه المسيح
ناظم نور الدين
طلع مفيش فايدة يا مؤمنين بالله
البير معكر ميته وضاع غطاه
والعقل تاه
لما ابن ادم خلع هدومه
ولبس عباية إله
العقل ضل إذا استظل بنار جهنم
مبقاش فيه مغنم
لو ف وسط النور
يا خلق تتوه خطاه
يا عيسى يا مصطفى
العقل نورة انطفى
والصبر لما انتفى
إيه نفع إسلامك
يا موسى لازم تخاف
النار مبقتش برد
ولا السلام يتشاف
ولا حد حافظ عهد
يوسف ف بطن الحوت
ونسان بصوت الزئير
من غنا الطاغوت
يونس ما بيفسرش سنواته العجاف
ولا السنابل عمرها بتطرح ديدان
غير عندنا
يا أمنة يا أم اسماعيل
جه ميت دليل
من دم ناقة إبراهيم
لحد صلبك يا خليل الله يا طه
يا قايمة المعجزات
يا بردها ونارها
مين اللي نورها
فأنذرها
فكان إعلان لتدميرها
لما سالومي اشتهت
دم أسحاق الذبيح
طه المسيح
قدم رقبته فداه
لجل الوطن يحيا
لما النبي يحيى
أمر العصا الحية
تشق بحر الخوف
طلعله ميت فرعون
من خمسميت ناحية
يا عدرا يا ام المؤمنات
متقلقيش م الموات
كل البنات عاقر
والخمر متعاقر
ف الكعبة والاقصى
وسالومي لسه بعريها
بتكمل الرقصة
أخلع نعلينك يا هود
ومتنتظرش اليهود
لانهم
العجل سارق لبهم
ولم ألواحك بلاش تكسرها
ومتشغلكش المسخرة
الفجرة ما يخشوش طره
الجنة جاهزة وف انتظارهم
ما أكثر اللي هيقبلوا أعذارهم
بالعفو عند المقدرة
وكلنا من نسل صالح
ويبدأوا لعب المصالح
والكعبة تتقسم ما بين
يهود خيبر
وبين كفار قريش
فيموت إيمان الانبيا
والخوف يعيش
وآدم ينام
ويسيب سفينته للطوفان
ولما نام عريان
كل اولاده ضحكوا عليه
يا ولاد الايه
ايوب ما بيخوفش جن
وهدهده فضل يكمل عند بلقيس الجميلة
وف يوم وليله نوح يقابل الخضر
وينكر علمه على كل الملأ
ما العلم عند الله يا مؤمنين بالقلق
البحر لما اتفلق
هل الطوفان من بعيد
وطلت السماوات من سدرة المنتهى
لما اوانها انتهى
وقعت بعون ربها
في كفة السحرة
خدامين فرعون
يا ربنا يا ابو الغلابة
خليك بقى ف العون
إدريس ومزاميره
ما يطردوش ابليس
تصنع يهوذا الخبيث
والغش والتدليس
وبياعين الرقيق يتفاوضوا على هاجر
لما المسيح هاجر
نزل الكتاب على مصر
وصلى بيها العصر
رغم انها مكانتش طاهرة
ومش عايزة تتوضى
والكعبة مفتاحها
ف جيب خادمها م الركنة ليه صدا
نامت أيات الزنا في كاسات من فضة
لما الشيطان عدى على عقولنا وبال
وصلى بوضوء فاسد
دم المحيض يطرح جناين شهوة الكفار
وصام صيام الاوليا والخلق مش صايمة
والناس صايبها وبال
يظهر مسيخ دجال يوحد الأمة
والشمس تطلع م الغروب كل يوم
والدنيا ليه قيامتها مش قايمة
