سفر الغياب - آية التوهة
ناظم نور الدين
" من ديوان علاء الدين وعروسة البحر .. أسفار من العهد اللي لسه ما جاش "
- مفتتح -
كان كل ما لسانك يقول جملة خلاص مبقتش أحبك
كات كل نقطة دم فيكي تقول بتكدب
لما انتي يعني نسيتي حبي للدرجة ديه
ليه وانتي نايمة كل ثانية تقولي أسمي
كانت الأحلام ف كفك
وببساطة
زي كوتشينة عبيطة اتفرقت فوق البلاط
بنت واقفة جوة برواز القلق والشك والخوف م الخيانة
قلب شايب شاب ملمش لمة واحدة ولبسته أنا
والولد اللي ياما كان يقش جاي متأخر كتير
نزل على الارض اتحرق
كانت الأحلام ف صفك
وببساطة
زي شطرنج أتلغى الدور من بدايته
لما حاوطوه العساكر طابيته اتشرخت وباشت
والملك شاخ والوزير ركب حصان من جنب خانة فيل
خطوته بتهز خانات الأمل ف الجيم فينتهي بالتعادل
لما جيشك وجيش عدوك
كل القطع وقعت على أرض الخسارة
كانت الأحلام بتلعب لعبة القدر المخيف
القدر السخيف
اللي خلاها كدة ضحكت علينا
لما غرقنا الغياب في حارة الشارع وبوشنا
كات واقفة تضحك ع الرصيف
إنتي والأحلام وأنا
طلعنا أكبر أغبيا ف الكون
كل واحد راح لحاله ف سكة مش عارف اخرها
رغم اننا ع الاقل الفترة دي
كنا ممكن نتفق
