إعلان

الرئيسية » » أنا وأنتي والبحر وتؤام الأحلام | ناظم نور الدين

أنا وأنتي والبحر وتؤام الأحلام | ناظم نور الدين

Written By Unknown on الخميس، 26 فبراير 2015 | 3:30 ص


أنا وأنتي والبحر وتؤام الأحلام .... إلى هدير
ناظم نور الدين


البحر سلم ليكي رايته

وقلع عبايته

ورماها على كتفي

البحر يتاوب حنين

على وشوش الاحبة الصبح

وموجته اللي شبه لقانا النهاردة

تحضن الأحلام

ف عيون اللي صاحيين للندى بدري

وأنا وانتي على مسافة الحنين قاعدين

الرمل يتسرسب فراق مع شدة الموجة

ولسه الحلم ف عيونك بيرسمني

علاء الدين على الرملة

فردتي رموشك بساط الريح على خدي

فانام شبعان

من الرضا والحنين ليكي

اقرب وانتي جوايا بتتمايلي على قلبي

كما الفراشات

وبتشدي ميزان الغنوة وايقاعها بتنهيدك

وانا ف ايدك الاقي عنيكي تحضني

ده لما بتبقي مشتاقة بتبقي حبيبتي

بتجني

على شعرك نجوم مصابيح

بتحضن في الحشا الجني

يوميها الجني كان كسلان

وانا عايز اجيب نجم السما ينور على رموشك

طب اعمل ايه وانا بساطي

ميقدرشي يعدي م السما السابعة

ويقطف وردة م الجنة يجيبهالك

اغنيلك اغاني الحب

بشفايف الألم والملح

تسامحيني

وغفرانك يكون اقرب

من حبل الوريد ليه

تسامحيني

تسامحيني

واغرق ف السماح اكتر

احسن بضغفي قدامك

وعريي ما تسترهش ورقة توت

ولا سحابة تضلل ع اللي بينا وبين عيون الناس

ابوسك تحمل القمرة ببدر جديد

بياخد حنيتي الغايبة

وياخد طيبتك الحاضرة

ايديكي بالحنان قادرة

لما تلمس الرملة

تخلق جنتي الخضرة

واتوه انا وانتي ف الريح اللي عامل

ف السما حضرة

انام على صدرك امبارح افوق بكرة

ونصحى بنشوة السكرى

نلاقي جسمنا مندي من الأحلام

وف حشاكي

وليدي الحلم بيرفس

ابوس ايدك

ويطرح حلمنا توأم

بكلمة ونور

لكن وقت الغروب كالعادة

بيخونا ويخزلنا

عشان مرواحك البدري قوي

خلاص قرب

وترسم خطوة البعد اللي بينا

فدان عذاب وقلق وخوف عليكي م السكة

وقلبي يتعصر من فكرة انك ماشية من تاني

وتتسرسب عروسة البحر من جنبي للميه

معاها تؤام الأحلام وتبعد ف المدى الواسع

عشان استنى البحر

يسلم ليكي رايته

ويقلع عبايته

ويرميها على كتفي

لما يتاوب حنين

على وشوش الاحبة الصبح

وموجته اللي شبه لقانا النهاردة

تحضن الأحلام

ف عيون اللي صاحيين للندى بدري

وأنا وانتي على مسافة الحنين نقعد

والرمل يتسرسب فراق مع شدة الموجة

ومن تاني الحلم ف عيونك يرسمني

علاء الدين على الرملة

وتفردي رموشك بساط الريح على خدي

فانام شبعان

من الرضا والحنين ليكي



التعليقات
0 التعليقات

0 comments:

إرسال تعليق

نبذة عنا

Restaurants

يتم التشغيل بواسطة Blogger.

Travelling Diaries

Entertainment

Technology

Restaurants

Travelling

Entertainment

Technology

تسمية 4