اللي سرق مصر
ناظم نور الدين
قالوا زمان
اللي بنا مصر كان في الاصل حلواني
واللي سرق مصر كان ف الاصل شيخ منصر
عمره ما كان ابن ادم من اصل حيواني
يمص دم الغلابة وعلى الضعيف يقدر
اللي سرق مصر كان في الاصل راس حية
السم فيها معبي من تلتميت ناحية
تشوفها تقول دي ماتت لكنها صاحية
واما الولاد مرضوش يعيشوا ف ذلها قاموا
قالوا تحيا يا مصر ف حس واحد
والكل قام حيا
اللي سرق مصر كان في القصر ف القبة
واخد العروبة مقام شي الله يا اوربا
امريكا تبعت رسولها يقوم يبوس ايده
وهو عبيد العرب ف واشنطن الكعبة
اللي بنا مصر عمره ما سابها يوم بتئن
للي سرقها وهما يومين وقلبه يحن
واللي سرقها ميعرفشي ان اللي بناها
يعرف طريقها بقلبه ولو ف عب الجن
اللي سرق مصر علي بابا والاضيشه
فاكرها قال المغارة وهتلم تهبيشه
طلع الحرس فايقين جابوه راموه ع البرش
ويموت بغيظه اللي نهبها وأهلها يعيشوا
علي بابا بعد الهنا لابس ف ايده حديد
من بعد عز وسرور وجمال بفكر جديد
كان الغشيم فاكر إن الرجال خلصت
الضربة جاتله يا عيني من أخر العنقود
مصر النخيل في الربيع يقلب وبيزمزم
لو يوم يخونه الريح يثبت ويتقدم
بايدين هلال يدي الزعف ف العيد
ويعمد المواليد في ميه من زمزم
اللي بنا مصر واللي سرقها مش شققا
اللي بناها بناها بكده من عرق وشقا
كان كتفها اللي ساندها لو مال عليها الضيم
واللي سرقها عقيم يستاهل الشفقة
