مصر الصبية البهيه
ناظم نور الدين
هبدأ صلاتي وسلامي ع المصطفى الهادي طه
زين الشباب التهامي خير البرية وعطاها
وبعدها يكون كلامي على ثورة غطى ضياها
على فساد الحرامي اللي نهبها وأذاها
كلام ومفيهوش مواربه وبحق سورة تبارك
لا صفاته م الحسن شاربة ولا هو اصلا مبارك
حرامي ودماغة ضاربة يسرق نهارك جهارك
وفاكرنا نصبه ونهبه وفاق الشباب مين أجارك
ياللي سرقت البلد دي وفاكر كنوزها في مالها
لو كنت شوفت الشباب دي اللي ف ايدهم أمالها
كنت بضميرك تبدي حلم الولاد دي وعملها
دول خد مصر المواردي هما كنوزها وجمالها
ولا كات سوزان أم ليه ولا أم حد ف ولادنا
أمي الصبية البهية مصر العفية بلدنا
وآدي أمي ف البيت أهيه بتدعي ينصر جهادنا
على فتنة جت طائفية لصليب بيحضن ف مادنة
ولا جماله وسروره ولا حد فيهم شريف
بعكرة وشوشهم يغوروا مين اللي فيهم نضيف
يا عز بانت شرورة على الفقير الضعيف
وعادلي ساب ديكتاتوره يسقينا طعم النزيف
يا ديول ديول النظام ديل النظام مقطوع
دلوقتي وقت الكلام للشعب صوت مسموع
لموا عزالكم قوام وجودكوا بقى ممنوع
ده ابن مصر الهمام عمره ما مات م الجوع
يا ثورة طلعت ما خلت م الظلم شيئ موجود
يا شعوب من القهر ملت طاقتنا ليها حدود
يا فجر م الضلمة أفلت خلي الضيا مفرود
ويا بكرة بالعزم سفلت طريقنا رشه ورود
