مش ناوي اكملها
ناظم نور الدين
متتكتبيش
بياض الصفحة احسنلي
من اني املاه باوجاعي
متتكتبيش
هواكي ف يوم ما احسنلي
جرحني وكان مفيش داعي
تجيبي سيرتي ف كلامك
وتقولي ع الملأ اسمي
وقلبي بكتك لامك
ما برسمكيش وتترسمي
طب اعمل ايه وانا اللي كل ما بشخبط
ازيد تفاصيل على الصورة
واغمض وابقى ماشي اخبط
والاقي عنيكي فزورة
متتحلش
وتتكتبي
وغصب يا رب مش قادر اطاوع قلمي يكتبها
اكيد دي مؤامرة وانا عارف اكيد انت مرتبها
متتكتبيش
عشان فعلا محبتكيش
تكوني طالعة بالفطرة من الوجع اللي ساجني
كما ف ليل الأسى جني
يونسني يجنني
فتبقي قصيدة مسحورة
وتبقي نهاية الشعر اللي ساكني
بداية بكرة مش عارف واخدني لفين
لكن عارف ان الشعر
هيكون أبعد شيئ عني
وهبقى مفيش
متتكتبيش
وتتكتبي
مادام عمالة تتحدي وتتكتبي
واقاوم وانتي تتكتبي
واقوم واقعد على ركبي
وبتوسل عشان تهدي ومبتهديش
لكن لساكي بتعاندي
وبتكابري وتتحدي
لكن عندك اقل كتير من عندي
وانا مضطر دلوقتي
مكملكيش
