إعلان

الرئيسية » » بنت ما بتغيبش الشمس ف عينها | ناظم نور الدين

بنت ما بتغيبش الشمس ف عينها | ناظم نور الدين

Written By Unknown on الأربعاء، 11 مارس 2015 | 7:22 م


بنت ما بتغيبش الشمس ف عينها
ناظم نور الدين


عينها بترفض نور الصبح

إذا كان مغلوط

وإذا كان مخلوط بشعاع

بيحب الذلة

وبتكره ليلها يروح لشمس الغش

ويشحت ضو

القهر بيرسم فوق أحلامها

سحابه بتسود مع الأيام

وتشق القلب من الحسرة

علي كل اللحظات الحلوة معاها

عنيها سبيل

بنت بتعشق زرع المواويل

في ضفاير كل بنات الحي

مع موسم حصد الشوق في عنيها

أفراحها بتطرح جبر الخاطر

جواك

واكمنك شاعر

قلمك بينقط سحر كلامها قصايد

والشوق القايد بيطفيه

زوغان عينها وحيرتها في حلم قديم

عاشقة وبتهيم

في معاني يوتوبيا الدنيا الجاحدة

علي الأحباب

لو بان الشوق في عنيهم بترد الباب

تكسفهم وتخيب فيهم أحلامهم بيها

كانت عشقاني وعشقاها

وكأنها عارفة إن الأيام الصعبة دي هتعدي

وتيجي الأيام العاشقة لكل خطاوي الناس

بتشكل حلم الفقرا بصبر

وبتعصر من عناقيد الفرحة

عرق

بتسكن بيه جراح المجروحين زيي

بنت ما بتغيبش الشمس ف عينها

وبخاف تعشقني وتستنشقني

بخور العند في لحظة ضعف

لما الأيام تقسي بتهادن

لكني بيني وبين نفسي جبان

بخاف للمس منها يطولني

يخبلني

ويتوهني في سكة حلم جميل

أعيا بالوهم

وأدمن غرز السهم ف قلبي

زى شعرا الحواديت

واتلجم بالكدب في قصيده

بتبدأ من أول قافية بتغزلها عنيها

بحبك

وعشان ما بحبها اكتر من نفسي

علشانها

بادور فيه ع الإنسان

برفض قدامها أتهان

أو إن ف لحظه الشوق جوايا يبان

في كلامها بتوصل كل مراكبي الواقفة ف شط بعيد

كانت بتحاول تجمع بين شطين يوم فرق بينهم

مية وقلع مراكبي

دلوقتي بحس إني مهان ومدان

لما ببص في عنيها

والقاني خسران رهان

الفارس اللي بتحلم بيه يخطفها

لدنيا الحواديت

وأنا متكتف من كل الاتجاهات

عامل زي الفرس الحرنان ع الفاضي

وأشوف أزاي مرسومة الصورة

نجاتيف متاخد بالعكس

مشدود علي طرفه الزيف

والطرف التاني نزيف شعري

وأنا السيئ وده ظني

مانيش إنسان بيحلم يبقي فارس الحواديت

ما تشغلنيش يوتوبيا العالم المقرف

ما دام قلبي

صورة وقصيده وبيت

بيضم الحلم جوايا

بنت بتعرف تغزل م الشمس الضحكة

وتموت جوه قلوب الناس

الخوف من بكره

عنيها بترفض نور الصبح إذا كان مغلوط

وإذا كان مخلوط بشعاع بيحب الذلة

وبتكره ليلها يروح لشمس الغش

ويشحت ضو بينزف داء

بنت بتتشكل ويا خيوط الشمس

وتبقي سناء



التعليقات
0 التعليقات

0 comments:

إرسال تعليق

نبذة عنا

Restaurants

يتم التشغيل بواسطة Blogger.

Travelling Diaries

Entertainment

Technology

Restaurants

Travelling

Entertainment

Technology

تسمية 4