الأسود ليس بإتجاه القبلة
محمد الكاشف
ولسه التوهه جوايا وبتجري في التفاصيل
ولسه الصورة مش واضحة
والقلب همه تقيل
والليل بينزف ليل
جوا البيوت م الهم
أبيض يا لون الموت
أسود يا لون الدم
رزق العيال ملتوت
الغربة ملهاش عم
يلعن أبو اللي يفوت
م الزحمة فوق الدم
دم العيال اللي عارف سرها
خارج من قلوب الكرسات بعد فك الخط
وجمع الحروف
وحسبة الأرقام
بالظبط ويا الربط
جوا الشهادة وشوية التصاريح
اللي في طرف جيب البنطلون
وحزن العيون
والروح المقلوعة من زحمة التباريح
رايح في وسط الريح
سايب خطاوي النبض
رافض يعود للأرض
اكمنه أقرب للسما م الصوت
والصوت
عجلة خشب شبطانة في الملكوت
بهتانة ملامحها
عايزة تعدي
تفوت
والرب مش عايز
جايز شرايط الكاسيت
والخوف من المجهول
وتغريبة الفقرا
ويا دمع العيال المفطومين م المُر بالمُر
وبحتة الصبار
ولون النهار
ولون العينين المسروقين
المخلوقين من طين
مش مخلوقين من نور
هما السبب في الغُلب
واللي يشوف الغُلب من صغره
مقسوم له الشقا يلقاه
واللي يلاقيه الشقا
لازم يشوف الموت
زي البنات البكر أخويا لما مات
ولما عاش ويا الخلايق
في البطايق
وفي الشوراع
وفي البيوت
ساعة ما كان بيفوت
بيروح الخرس
كان الونس
فمش غريبة
إني ألاقي ريحة الملايكة في ضل شجرة توت
كانت بتشرب من قناوي ضحكته
فتكون غيطان م الورد
مشاع للي يحب الحياة
وهو حب الموت
"حبيبي يا أبويا ما بقتش غير صورة"
من نظرة في الملكوت
صابني السكوت
وسابني الصبر
حاولت ألضم مهجتي بلون الحمام
حاوطني الجبر
وحاوط طيور الحلم في الحضرة
وداس ع الزناد
فكان الحصاد من غير ميعاد
والملح بقى مطرة
ده القصد كان: نظرة
مش توهة وشتات
في دايرة الملكوت !!
كل الخيوط من ربط طرح البسملة
ف شوق العيال للبلونات
سقطت كل الحساب م المسألة
لملمت كل اللي فات
ورجعت كل الحاجات للمبتدأ
فكان الخبر م الذكريات
العيب ف رأس المسألة ؟!
ولا ف طرح البسملة ؟!
ولا ف لبس المريلة ؟!
ولا ف صلاة الفرض ؟!
روح الولد زي الوتد
ماسكة في جدر الأرض
وفي السبع سماوات
وفي البراح
اللي اتوجد من كف أبويا
وحِجر أمي ويا بعض
الروح روايح البنات في حد السعف
وزغرودة طايرة في المقام
وقت المطر
من قلب مليان بالشغف
الروح في فاطمة المؤمنة بحضن أمها
وضم الغناوي في كفها مع ربطة الطرحة
والفرحة مش طارحة
من قلب بنت بنوت
صابه الوجع
وقطع طريقه الموت
مش سطر واحد "الوجع"
أو صفحة مقطوعة
من غير مناسبة
من كتاب فوق الرصيف
مهدورة قيمته من رغيف
مجهول النسب
ده نار بتنهش م البداية في كل شيء
وبدون سبب
بتصفي روحي فوق قضيب كلمة "عبث"
والفعل ممزوج بالخرس
وبالخيانة المطلقة لكل المبادئ والقيم
واللي اتظلم من دا الوطن
كان م السما مشحوت
فما تلموش القلب على بوحه
وما تمنعوش رسم الحروف م الصوت
"سر الحياة أصبح في قلب تابوت"
وباين علينا مندورين للموت
والموت ما بيرمرمش
الموت بيفهم مش غبي
الموت نبي
بس الملامح في الصبي ما بتتعرفش
الموت دموع ما بتتكتبش
وما يستحيش
الموت مُخلِص ع الصليب
وعشان كده لازم يعيش
وما تصدقيش
إلا القلوب المؤمنة بحلم الولد
وما تحسبيش إني إتخلقت
أو اتوجدت
أو ما كنتش من مفيش
■ ■ ■
