قبل اللقا فيه غياب
ناظم نور الدين
سفر السفر
- 1 -
مكتوب علية السفر
وسط الخطر والموج
ولا كنت يوم سندباد
ولا حلمي الاقي كنوز
عايش بقلب شريد
م الجنة كان مطرود
ومكانش فيه حوا تغري
القلب لما تعوز
حاولت أكون شاطر حسن
لا طلعت شاطر أنا
والحُسن مش لايق
ويعمل ايه اللي على مركب
مالوش دفة
الموج سايقها
وهو لوحده مش سايق
الشمس حامية
مفيش ضلة ف عرض البحر
والبحر هايج وغضبان
وأمتى البحر كان رايق
من صغر سني وأنا
واخدها شط لشط
والمركب اللي تودي
ما تجيبش غير أحزان
عيل ف كتب الهوى
عمره ما فك الخط
كان فاكر إن المواني
هتاخده بالأحضان
فارقت أهلي وانا
عيل ف قلبه كهل
عجز وشاب منه
قبل الأوان بأوان
عشق العلوم كلها
لدرجة حد الجهل
العلم مش ف الكتب
والبحر كان نعسان
نايم ف عز النوم
ليه بس صحيته
ومركبي
مش قد فورانه ولا هوجته
عصرني بين موجته
ورماني على شط
ماداسوش بشر قبلي
هو كدة نفاني
ولا حظوظه كدة
كات بادئة تلعبلي
وعرفت معنى الونس
رغم اني ما لاقيت ناس
الوحدة مش قلة بشر
الوحدة بالاحساس
نايم على الرمله
مستني مركب تفوت
البحر كان منجلي
امواجه يتلاعبوا
سهمت فيه قام ضحكلي
وزادلي من لعبه
ومن بعيد الهوا نسايمه بتهفهف
بصيت وطال النظر دي ايه
اموت واعرف
شفتك وقلبي اتخطف
والشوق لعب بيه
معرفش إنسية كنتي
ولا أنتي جنيه
حورية نايمة على موجة
وبتغزل م الهوا سلالم
بتطلع للسما السابعة
شالني الهوى مرابعة
ورماني على شطك
شوفتك وشوفتيني
ونزلت بحرك وأنا
معرفش ف العوم غير الغرق
بقى قلبي مركب ورق
خدني لقربك وداب
وكأنه مسه السحر
وضحكتي ضحكة شالتني
ودتني ع الشط تاني
معرفش خايفة عليه
ولا انت مش مستأمناني
وغطستي وسط الموج
وغيبتي بين لؤلؤه
معقول انا شايف
عروسة بحر
