إعلان

الرئيسية » » عشق النسا مربعات من فن الواو 1 | ناظم نور الدين

عشق النسا مربعات من فن الواو 1 | ناظم نور الدين

Written By Unknown on الأربعاء، 11 مارس 2015 | 7:15 م


عشق النسا مربعات من فن الواو 1
ناظم نور الدين


في الأولة بمدح الزين

طه اللي نوّر تهــــامة

من بعده في القلب حزّين

وهو بــراءة التــهامـة



والتانية بمدح صحابه

اللي ف طرق خيره ساروا

شوق باتبه قلبي وصحا به

واللي ف هواهم مساره



والتالتة دوبت ف آل البيت

هما مرادي وهوايا

ندهوني م البعد لبيّت

وواخد هواهم هواية



عشق النسا له علامات

وله إشارة وأمارة

فيه اللي لما علا مات

ولا طال قلوب القمارى



عملت قلبي مشاع لك

ليكي جناينه وقصوره

ف الضلمة كانلك مشاعلك

وتنطي من فوق سوره



نزلت دموعي عليكم

وايديكوا ولا نشفوها

قاعد بدور على كُم

نزلت واهي الناس شافوها



كتبت شوقها قصيدة

أوزان بحورها حنتني

ولقتني ف الحب صيدة

كتبتني انا ولحّنتني



قلبي اللي منسوف مناسف

نزلتي خبره ف جرايدك

هو اللي غلطان وآسف

علشان بعبطه جه رايدك



عشمتي قلبي ف حلمه

وبعدتي ليه بعدهالك

خلصتي صبره وحلمه

بقى قلبي ف البعد هالك





قلبي اللي جاكي بإشارة

حافظ مداكي ومجالك

ملقاش ف حبك بشارة

يا ريته حتى ما جالك



ضربت م الفرح طبلي

وعملت سبع البربمة

ولقيت هواكي ما طاب لي

بقيت ارقص السامبا رومبا



عارفاني شكاك وريبتي

م الحب اقولها بتعالي

أول ما جيتلك هربتي

فين بس رايحة تعالي



شاعر وأكتب دواوين

يحتاروا فيها اللي سبقوا

تعبان وأقول الدوا وين

سيف رمش عينك جه سبقه



قلبي اللي شاف م الحريم

ما أداش أمان للسفيهه

تحرم على القلب تحريم

وأنا قلبي أهه لسه فيها



الصبر مني نفد

والفرح شافني جه راكن

وسهمك ف قلبي إن نفد

هيعبوا دمعي ف جراكن



عملتي للقلب فورمات

وأتاريكي بتدلتيني

مش فورمة واحدة دي فورمات

على جرحي ليه دلتيني



طب إيه أنا اللي فهمته

لما بيكنسلوني

قلبي بنزل ف قيمة

مصيبه لا يكون سلوني



ولا حد قبلك ملا عَين

نظرات عيونك كفوني

والفقر والغربة ملاعِين

في البعد عنك كفوني





قولتيلي دايبة وعاشقة

وحلفتي بيه وجمالي

وأنا ف هوايا أطلع أشقى

بركت ف حبك جمالي



بتقولوا ليه علتوني

وإن فوت يضرب بروجي

كنت الصحيح علتوني

هديتوا قصري وبروجي



عنيكي لبن البلح راب

وماتت ف بعدك مباهجي

دي عنيكي قاتلة بلا حراب

تمدحني كل أما بهجي



على قد ما الواحد فتح باب

الحب وقعد براحته

على قد ما الواحد فات احباب

كان غصب أو كان براحته



فايت عشانك أهالي

تاهت جمالها ف بيدي

وحياتي لما لقاهالي

بقى قرار قلبي بايدي



أول ما سيبتك وحشتك

طب ما أنتي بتوحشيني

لا على الرجوع ليه حوشتك

ولا يوم قدرتي تحوشيني



التعليقات
0 التعليقات

0 comments:

إرسال تعليق

نبذة عنا

Restaurants

يتم التشغيل بواسطة Blogger.

Travelling Diaries

Entertainment

Technology

Restaurants

Travelling

Entertainment

Technology

تسمية 4