ناظم نور الدين
احضنيني حضن أشبه باجتياح
لما ريحة روح تهفهف جوة حضني
تتولد في الروح رياح
قادرة تمحي الحزن فيه
قادرة تاخد ايدي للشط البعيد
فأدوق حلاوة الارتياح
احضنيني حضن زي اللي اتولد
على غفلة بينا
حضن خالد للأبد
مش بس لحظة ما اتقابلنا
صدفة أو مترتبة
مين هيسأل الزمن لو مرة وداه للصبا
مين يعاتب المكان لو مرة وفرله البراح
شديني ليكي زي ما شديتي روحي
قبل ما تشدي القميص
اطبعيني وشم فوق صدرك
واكتبي كان التاريخ ف يوم خميس
لما اللي قلبه حرامي قرر
يسلمك قلبه وانتي البوليس
حضن يعصر عنبي والكرم اللي طاب
على كتفي من صبر السنين
فسال نبيتي بهجةً للشاربين
واتحولت مسامي لشكل أشبه بالخريطة
لجنة لكن جنة بجد مش عبيطة
في أنهار من عسل سالت لقا ف صهد الشفايف
والخمر كان أصدق من روح معبقها الشيفاز
جري اللبن قاصد يصب ف نهر عطشان للونس
علشان تنبت فوقه أشجار الغنا تطرح لقا
بعد الغياب
دعيت يطول الحضن أكتر
من فكرة الوقت اللي مسروق من عيون الكون هبة
ليه النفوس بتبقى دايما جوة حضني طيبة
ليه الرضا دايما عزيز لو طلبت أنا رضا
متشوهيش الحضن بمرار الغياب
وارجعي اسكني الجنة فيا
ومتخافيش ده أيوة كان حضني بجد
ومكنتش الكاميرا الخفية
مستني تجمعنا ف نفس الحضن تاني
نفس لحظتنا الوفية
وساعتها من غير أسئلة هتملكك
وساعتها برضه هتملكيني
فاحضنيني
