البنت اما تحب...
وليد الاسيوطي
البنت اما تحب...
بتكون ف الرقة كما الفراشات،،،،
وتكون كنسيم بيعدي على الماشيين ف الزحمة...
وف عز الحر تكون .. رحمة ،،،
بتكون نفحات
وف عز البرد تكون أحضان
مليانه حنان
بتدفي القلب العاشق كل كيانها
وبتحيي الورد ان عدى عليه الصيف او مات
و فـ عز الحزن وشيل الهم تكون الضحكة
وتكون كـ موسيقى بتملى حياته كمان ألحان
بتكون نغمات
***
بحلف وبربي
ان كانت كاتبة كمان أشعار
بتكون الكلمة يدوب منها
بديوان في الحب من المتنبي
واحلف بالله
لو بنت في مرة تقول الشعر
بيقشعر جسمي
وأتمنى يكون لو بس يدوب سطرين في كلامها باسمي
وتطير و تعلق فوق في الكون بكلامها الضي
وتاخدني معاه
و أدّروش كده و أطوّح واهتف
الله حي
وأقول الله
.،
من قصيدة شاعرة
