النهايات محتاجه بداية
محمد سمير مصباح
النهايات محتاجه بداية
والبدايات ليه مبتبدأش؟
عمري ف عربية ف حوداية
بس السواق لسه ماساقش
أنا مخبول مخبوط ف قفايا
جوه مراية بحب النقش
قولت السما هتجيبلي هَدايا
بس الحلم دا ماتحققش
قولت هنام والرؤية هِداية
جالي كابوس قال: متنبأش !
شفت الخلق بتجري ورايا
وانا محبوس _باين_ف النعش
كان جسمي الملفوف بعناية
أشبه ببوكيه ماتجمّعش
فجأة الناس كسروا الكوباية
قالوا المكسور مبيرجعش
لفوا (الواقع) جوه ملاية
حطوه داخل (بوكس).. ماطاقش
سألوه عن أعداد لـ وَفايا
_وانا منهم _ أنكر مانطقش
لفوه تاني ودفنوه معايا
قفلوا التُربة عشان مازهقش
كنت هقول بس اقرولي آية
بس صحيت وانا عقلي مافاقش
فجأة لقيت الخلق بتجري
والدَبَلان ملفوف علي حِجْري
واحنا ف كام م العام الهجري؟
مش فارق ما انا كده كده ميِّت
عايش مَيِّت .. مَيِّت مَيِّت
قولت: يا (واقع) جَيّ تبَيِّت ؟
قالي: هبَيِّت .. ماتحمرَّقش !
