شيزوفرنيا الجنون
عمرو شاهين
شيزوفرنيا الجنون
- شوفت القمر
لساه ب يبدر فى الفضا انغام غرام
وانت اللى غرقان وسط دايره تخمينات
.... استنتاجات .. هلاوس
ايه اللى ناقص حضرتك علشان تشوف الدنيا ب اللون المناسب
.. الحياه ؟
البنت بتاعتك .. اسف
قصدى اللى انت تهت فى حبها
رفضت تسلم نفسها لشيطانك الملعون
واختارت تسلّم قلبها لقلب الشيطان
اللى كان فى الاصل .. انت .
- ماله القمر ؟
دايما ميلاده مقترن ب حدوث جريمه
ماتبصليش .. طبعا جريمه
الشمس
لما تطلع فوق على قمه جبل
و بأختيارها ترمى نفسها ف قلب الغويط
يبقى انتحار
وحبيبتى
كل اللى كان اصلا ما بينا
برواز
كلمتين حب فى جواب
ورده محشوره ف كتاب
ومكالمتين
بعدين فراق
- الفراق كان اختيارك ف الاساس
ف بلاش تلومها على الالم
- الالم احساس صديق للوحد فى زمن اللاشىء
تقدر تقولى بحكمتك
لو ان عقلى ما زال سليم
ومأوجدكش
كان راح يكون ايه موقفك
مش كان زمانك زيى واكتر
نزوه جنان متعفنه ومكركبه
مرميه فى اقصى يمين مخى الرمادى
لكنى مجنون ب الهوس
او حتى مهوس ب الجنون مش ده المهم
لكن المهم ان الجنان ده اوجدك
ف بلاش تعيش دور البرىء
توب القداسه
مش راح يليق على شكل شعرك
- حقك عيا انى انصحك
او اتوهك
اختار لنفسك سكه من بين السكك
- اختار فراقنا
نفسخ العقد اللى بينا وكل واحد مننا يمش فى سكه
ب تضحك ؟؟!!!
ايه ف الكلام ده يضحكك؟؟
- لو كنت فاكر ان الفراق بينا متاح
يبقى ب تهذى
انت وانا
ضلين من مانيكان دميم
فى واجهه الفكر المعاصر
انت وانا
وشين ل فيش العمر
فى ايد المقامر
لكن خلاص
دور الرفيق مبقاش مناسب
ارجع ورا
اخلى ساحه الحرب للبطل الجديد
احساس فريد انك تفكر
تقضى نص العمر تبدع
وف يوم وليله
ابداعك المخلص اوى
ب يثور عليك وتكونله فكره
فى فضا مخه ..الرمادى
- مش هاتقدر
- امتحننى
ولا اقولك
عندى ليك فكره جنان
ده مسدس وفيه رصاصه وده اخوه
كل واحد مننا يضرب على التانى فى دوره
واللى يموت راح ينتهى
واللى يقتل مننا هو اللى باقى
- يعنى خلاص
مفيش خلاص غير دم واحد مننا
- لا مفيش .. امسك
يالا اضرب
( تك ) هه مفيش
اضرب .... مفيش
اضرب .. مفيش
اضرب .. مفيش
اضرب .. مفيش
اضرب ..( طاخ )
كان ضرورى اقتلك علشان اعيش
