في عــــــيد الحب
هالة فتحي
نمــــــــاذج ..... من العشـــــــاق
================
ليه ايديكوا مبعدين
و العيون مترددين
شفت لمحه حزن مكتوب ع الجبين
بتقوليله ازاي حتبعد
رد قال حكم السنين
رغم حب كبير و ساكن مهجتين
مش نصيبك
مش مقدر تسكني صباعه اليمين
و النهارده
جاي يوم العاشقين
جاب هديه
تبقي ذكرى للحنين
..
============
لهفه قايده النار حريق
و الورود ماليه الطريق
كل شئ بيقول بحبك
كل شئ
ف الايادي ورده حمرا
حرف اسمين جوه شجره
و الخجل محبوس ف نظره
كل شئ فيها جـــرئ
قربوا ولا بعــاد
حلم و اتحقق ميعاد
بين صوابع مشتاقين
يكتبوا شهاده ميلاد
حبنا بحق و حقيق
حبنا ... بحق و حقيق
..
==============
و انتي ليه يا حلوه وحدك
و الدموع دي زاينه خدك
حب ضايع
و لا لسه ماجاش لحدك
عارفه صعب الليله تبقي
زيي وحدك
بس بكره اكيد شايللك
حب سعدك
قلب وسعه يادوب قيراط يبقي قدك
امسحي دمعك و هاتي الفرح عندك
حتي لو 100 حب ضاع
لسه باقي حب واحد
بس واحد
للسؤال .... راح يبقي ردك
عيد حقيقي حييجي بكره
و النهارده .... كفايه وعدك
..
===============
جوه مملكه الهوى
ماشيه انا و قلبي سوا
الحنين متوصي بيا
و الدموع هي الدوا
عيني جت علي ركن دافي
قاعده فيه اموره حلوه
حاضنه صوره بحب وافي
و شفه بتدندن بغنوه
باع حبيبي و مش حيرخص
باقيه علي ذكراه و حأخلص
و ان نساني
او رماني
راح يزيد حبي و ما ينقص
كان غرامي ليه أمان
كنت بأطمن معاه
و النهارده مش عشان
وحدي .. راح انسى هواه
باقي حبي رغم بعده
رغم قاسي و قلبي حده
و النهارده في عيد هوايا
قلبي راضي يكون .. لوحده
رغم ضعفك كنتي جامده
وقفوا ضدك و انتي صامده
بالاراده بتثبتيلي
اغلي قوانين الموده
و اسمحيلي اهدي قلبك
النهارده .... احلى ورده
..
===========
احلي مشهد راح يكون
فرحه راسمه بألف لون
ابتسامه ما بين شفايف
و ضحكه بتلالي ف عيون
بابا ماسك كتف ماما
و الولاد بين حضنهم
السعاده اهيه علامه
طايره حوالين منهم
شايفه جواهم خضـــار
و ابتسامه انتصار
يعلنوا للكون بحاله
كان سليم الاختيار
لسه ماما ف قلب بابا
حبهم مليان طيابه
كملت الفرحه ف قلوبهم
بالولاد و دعاء جمعهم
كان مصيره .. الاستجابه
صوره تسعد كل قلب
كل يوم في العــــمر حب
...
..
برغم الحزن و الوجع و الاحداث التي ادمنت ان تضع في القلب سوادا و في العين دمع
اسمحولي اننا نفرح ... بس يوم
نحس فيه اننا عايشين
و اننا بني ادمين
بنعيش
و بنفرح
و بنحب
...
