ما بقاش يقصـــــدني !!!!
هالة فتحي
و كلام الشعر ما بين غناويه ما بقاش عني
و لا حتى بيفرق عنده كتير ان يوجعني
معقول باعني ؟
بيمايل خده لكل جميل معجب ولهان
و يخبط كل بيبـــان العشق بشوق عشمان
و لحد حدودي .. بيبقى جبان
مش عارفه ان كان
زعلان و عيونه ماليها الشوق انما تقلان
او غاب اسمي و بكل ثبات ضاع العنوان
يعني انا جواه
و لا التخبيط بين الامواج فعلا قســــاه
مش قادره اقراه
حتى ملامحه مش باينه عليها اي حروف
و ما بين سطرين بايت بركان بيـــنقط خوف
و غموض موصوف
يبعتلي الحيره تبعتر في حنيني الملهوف
و تقطع كل خيوط العشم المتداري ورا كسوف
و تعلق مشنقه للاحلام
و قرار اعـــدام
ملعون القلب المتعدي على حــــد الشوف
بقى اقرب منكم رغم انا فارشه العمر طريـــق
بيــــنوّر بينكم و انا ضلمايتي فـ عرض بريق
و يداوي جروحكم بحـــنانه
و بقسوه يزيــــد على جرحي حـــــريق
و انا ذنبي بـــرئ
و الله اتمنــــيته و صنته برموش العين
و حاوطت هواه و لا يوم خنته ... و لا فاتني حنين
و موافقه اكون ع البعد سكون
و ان عدى سنين
و هـ ألوم على مين
لو فرّق كل ابتســـاماته في شمال و يمين
أو شاغل في عيون حبيباته بتمنى لعـــين
ما اقدرش ألومه ان زادني أنين
انا حتى مانيش قادره اتأكد
ان كانلي مكان .. وسط الغايبين
انا اصلا باخطر على باله
انا اصلا مين ؟
و اخيرا و نهايه لحـــــيرتي
و تعاطف مع اوجـــاع غـيرتي
لو فات نواحيكم يتغزل ... ابقوا قولولي
لو جاب ســـــيرتي
:((
