لا .... تســـــتهين
هالة فتحي
لا .... تســـــتهين
خفت أصارحك ..... تستهين
لجل حبك يفضل البسمه لسنين
قلت أخبي عن عيون الدنيا حبي
قلت ادوق الصبر لما اشوفك و انت جنبي
...
قلبي صارحك.. و انت يومها كنت عارف
لحن حبك عاش سجين بين الشفايف
كنت عارف . كنت عارفه
كنت حالفه
اني اخبي... صنت حبك جوه قلبي
و انت ذنبي
ايوه ذنبي
بين عيون الدنيا حسيته بمعاني
ليه افكر في الاماني
ليه اعيش الحب تاني
ليه احبك ... تستهين
يا حلم سنين ..يا نبض انين . بيعلا بين ضلوعي
يا دمعه من دموعي
يا موجه ع الشطوط عاشت حكايتي من البدايه
يا عمري يوم بدايتي
يا ذنبي في النهايه
يا اللي حبك لسه عايش
ايوه عايش قلبي بيك
بس حايش حبي ليك
ان بين نظرات عينيك ............. مستهين
الحب عمر بيتولد جوه القلوب
نكبر معاه .. يبقي البلد .. يبقي الدروب
ننسي الزمان .. ننسي المكان .. نلقي الامان
نلقي الايمان بالحب و يضمه الحنان
ننسي الغروب
لكن خلاص........
الوقت فات
و الساعات الحلوه عدت في السكات
و الشمس غابت ع الحدود
و الموجه غرقت ع الشطوط
و القمر سافر بعيد ..... لجل ما يلين
و انت .. يـــــــــــا حبي الوحيد .... جاي تستهين ؟
