أنا امتى غلطت ؟؟؟
هالة فتحي
ليه دايما كده مكسور عشمي
ليه بيستسهلوا جرحي و ألمي
ليه يهربوا مني و يتخبوا
و انا باجــــري عليهم ... من غشمي
ليه عمري بادادي و باراضيهم
و لا عمري سكنت فـ أراضيهم
متهانه ... بيهم
و اتحمل صد و هجـــر طويل
و اصبر و اقول الصبر جمــــيل
يتكوم همي و يبقى جبال
و انا من غير شكوى بأوطي.. و أشيل
و بدال الجرح بيبقى جروح
و اتداوى بحجه عشق الروح
و لا عمري بافكر في مقابل
و اديلهم عيني ما دام مسموح
و باشوف غيري بيجرح فيهم
اجري و اطيب و امسح فـ الدمع
بيردوني و يبكوا عليهم
و أدوب و كأن انا تمثال شمع
و اغرق حرمان
و اهرب نسيان
و ارجع م السكه بشوق ندمان
اتغطي بدمعى و اتدارى
و اتحسر و اقول يا خساره
و افتش وسط مشاعر بكر
و ارجع بسؤالي ... محتاره
انا امتى غلطت ؟
