انا نفسي اخلف بنوتة
وليد الأسيوطي
انا نفسي اخلف بنوتة...
واديها العمر الجاي بحاله،
البنت اساسا مظبوطة...
على دقة قلب ابوها..
وعمو..
وخالو...
...
البنت اما بتكبر حبة ..
وبتعمل ع الجنب ضفيرتين...
والخد ينور بالورد..
والضحكة تكون ملو العين...
بتكون بالعالم والدنيا..
في عيون الاب الزعلان،،،
وبينسى جبال همه في ثانية...
من لمسة ايدها وضحكتها..
بيكون انسان كله حنان،،
...
البنت اساسا مخلوق...
مليان بالطيبة وحنية..
طب جرب على بنتك تضحك..
واعمل زعلان او بتعيط...
تلاقيها قوام جاية تطبطب..
او يمكن تبكي كمان جنبك..
علشان ماتحايلك وتلاعبك...
....
فانا نفسي اخلف بنوتة...
لكن.. انا عندي مصيبة صغنتوتة...
انا قاعد دلوقتي مبوز...
ولوحدي عشان انا ياجماعة...
اساسا انا مش متجوز!
