مات الولد
الولد إبن اللذينة
اللى ضحكه كان سفينة تعدى بينا أى حزن
واللى قلبه مفتوح للصحاب
واللى أحلامنا السراب كانت حقيقه بين ضلوعه
اللى عمر ما حد فينا شاف دموعه
أو فى يوم أعلن خضوعه
اللى كان قد اللى جاى
وأقوى من كل اللى فات
الولد ده الليلة .. مات
*****
مارجعش كعادته جعان
ولا شاط الكورة بتاعته فى التليفزيون
ولا كان متخانق مع صاحبه
مارماش الشنطة فى قلب الصالة وراح نازل يجرى
بدرى كان صاحى لأول مرة
ماتلكعش ولا قال تعبان علشان مايروحش
و أهو راح مارجعش
******
ما بالكلام الحزين بنغير المكتوب
كل اللى مات إرتاح
وإحنا اللى شيلنا ذنوب
*****
القصيدة ما إنتهتش
كل يوم بيموت ولد .. يتولد فينا هتاف
القصيدة تنتهى
وقت ما تلاقى الغلابة لا تخاف
