هو أنا نسيت أقولك
هشام صبح
هو أنا نسيت أقولك؟
بعد ما كسرت التلاتين
اكتشفت
الحياة لساها حلوة
كونك وحيد
_و ده مش جديد_
خلاك تشوف
قلبك اللى داب معافرة
لجل يبقى فى النافوخ
حبة من طيش الشباب
رجرجة نهديها بين شفايفك
و انت عارف
انها عمرها ما هتبقى ليك
بس كان فى قلبك شوق و جارف
لجل تخطف الأحلام فى لحظة
قبل ما يفاجئكم حد من الجيران,
لما كانوا بيندهوك
و الجلالة تسرق النوم من عيونكم
و الرحال تتشد من غير ليه و فين
حتى دول راحوا و فاتوك
وانت تانى
قلت تحلم
أو تلملم
من غَبارة الحزن
ضحكتين
والامارة
لسه دخان السيجارة
مالى ريحة الفجر
لما طب عليك أبوك
راح مخبط بالشمال فوق اليمين
و أمك اللى نور خدودها كان بيدعى
بكره يا ابنى
يهديك الاله
أو يهدك
لسه صاحى و الغمام مافارقش عقلك
من بقية الازازة
و المزازة مالية ريقك
و انت تخبط فى الحيطان
م الصداع
مش كان احسن
لو توفر
بق واحد م الطفاسة
لجل بكره؟
أديك نسيت
و افتكرت لما كسّرت التلاتين
ان لسه الدنيا حلوة
بس لو تبقى بق واحد
لجل ما يزيح الصداع
