أنا و لميــا حيث الهذي مستمر
( 1 )
إلى : لميـــــــا
وحدها تعرف / تفهم / تستحق
.
المعرفة عبء
والفهم بييجي دايماً بعد لما بيصبح اصطياد اللعنات حرفة
والحق ، كل الحق .. لما الألم يحفر فـ جدار الروح لوحة أروع من بيكاسو
.
عمر المعرفة ما كانت عبء
غير على كل اللى بيحاولوا يقاوموا الحقايق اللى هتوجعهم
و يمشوا ضد التيار
رغم كل التحذيرات الواضحالهم وضوح الشمس
طبيعى وقتها يخبطوا فى حيطة
و الفهم بعد شوية تجاهل ليه بيبعد
و يسيب مكانه مجرد عتمة
يستاهلها كل اللى قرر م الأول يعانده
أما اللعنة فمبتصيبش غير الناس اللى بتخدع نفسها
قبل التانيين
و الحق ، كل الحق
بيكاسّو برئ من كل دم المجروحين
اللى مصممين يسيبوا الوجع يمص دمهم
و لا أجدع " فامبير " لحد آخر نقطة
( 2 )
اللعنة على الطرق المتوازية
تلك الطُرق التى تُشبه بعضها فى كل شئ
حتى النهايات
.
هما دايماً بيخبوا حقيقتهم
مع رفع شعار "كل الطرق تؤدي إلى روما" ..
بس روما أبعد من امتداد بصري
أبعد من طول دراع بنت تخاف تمده فيتلوي
.
بس متقوليش روما
إحنا مش بتوع الكلام ده
و لا عمر طُرقنا وعدت بكده
خُدى دى كمان
عمر الناس اللى رايحين روما ما كانوا شبهنا
أو حتى يليقوا علينا
إحنا ناس معندهاش غير شعار واحد
" كل الطرق تؤدى إلى : إما الجنون أو الوحدة
إلا ولاد المحظوظة ربنا هيسترها معاهم
و يروحوا شرم الشيخ "
عشان كده عمرنا ما بنمد دراعنا
غير بس على أد المسافة بيننا و بين الباب
لزوم قفلته ورانا و إحنا ماشيين
( 3 )
اللعنة على المتاهات المتداخلة
تلك المتاهات التى تُغريك بمشروع أسطورة
تُمَّنيك بندبة مميزة لن يحظ بها غيرك
لتمنحك فى آخرها نفس العار المقرر / المكرر
.
وبتبقى أسطورة
ودايماً المقرر ليها ما يتكررش عند غيرها
حقوق الجرح محفوظة
وآخر خيط فـ نسل القلب لو يتكر
حيحصل إية ..
كلمتين فـ سرك ..
ساعات في دعوة نص الليل
بتطلب تنهي أساطيرها .. وتبقى فيلم عربي قديم
فـ انتظار النهاية السعيدة ، ويمكن رصاصة فـ الركبة تحل كل المشاكل
وترجع عمر الشريف جري قبل ما يفوت الوقت
.
بَكرة خيوط القلب مش باقى منها
غير يدوب قيمة ما يلضم كمان جرحين
هنشيلهم للظروف
و عمر الشريف ساب فاتن حمامة و هاجر
مرجعش غير قبل النهاية بساعة زمن
عشان يمثّل الشوية الباقيين فى عمره
و يغنى ع الجماهير
فلو هتدعى بقى الأسطورة تنتهى
خليكى فيلم أجنبى
ع الأقل ساعتها ممكن تقابلى
" وليام والاس " أو حتى " جاك "
صحيح هيموتوا آخر الفيلم
بس و إنتى عارفة إنهم قدمولك روحهم
تِـذكـــار
( 4 )
اللعنة على العلامات
تلك العلامات التى وضعها خبراء فى استراتيجية اللف و الدوران
تماماً كما لو كانوا قد درسوا تاريخ هزائمك كله
ثم تفننوا فى وضع كل الإشارات المُفخخة
و تركوك تتحسس بمنتهى السذاجة كافة الاحتمالات
.
واللعنة عليها لما بتصدق
إن وجود فراشة الصبح على إزاز شباكها ..
معناه إنها حتطير لبعيد
وإن وجود طفل صغير يشبه للاحلام
معناه إن الحلم بجد بيتحقق
وإنه لما يشيل ملامحها فـ عينه قبل ميلاده
معناه الدنيا حتتصالح وياها
اللعنة عليها قبل الكل
.
اللعنة عليها
لإنها بتسمح للمجاذيب و التايهيين يدخلوا دايرتها
و يكونوا أبطال حواديتها اللى مبتخلصش
اللعنة عليها
عشان بتبصله و تقول يارب هو
مع إنها عارفة إنه مليان ديفوهات
- مبتصارحش بيها حد غير على سبيل الهزار -
لا و الأدهى إنها كمان عارفة
إن قطع غياره مبقيتش متاحة
اكمنه ميستاهلش
اللعنة عليها
لإنها بتتبرعله بكل اللى محتاجه من غير ما يطلب
رغم إنها برضه عارفة إن قطع غيارها مش متاحة
اكمنها مفيش زيها كتير
اللعنة عليه
لإنه خلاها حتى وقت اللعن متلعنوش
( 5 )
اللعنة على مُدمني الدوامات
لأنهم مازلوا يُصدقون / يستجيبون / يتحمسون / يحاولون / و ينتظرون أن تتغير النتائج
.
وبمنتهى السذاجة..
دايماً يشيلوا قلوبهم من دفا صدورهم
ويرموها فـ إيدين ساقعة
تخاف مـ الود
.
الود بيخّوف
لكنه مبيجرحش غير بس أصحابه
و الحنية ما بتشّوكش و هى خارجة
غير حُضن اللى بيدوها
لناس ميفهموهاش
أما البرد و السقعة
فدول تملى طايلين طراطيف الصوابع
لحظة سلام بالإيد
على ناس كتير
ف الحُب قلوبها تلاجة
( 6 )
اللعنة عليك
لأنك وحدك تختار طريقك
و لأنه وحده الذى يُشبهك
.
واهو طريق شبهك
يا تكمله لآخره
يا تبيع سنين عمرك
والسنة فـ عمرك بعمر
.
روبابيكيا .. طُرق كتير بتضيع
روبابكيا .. طُرق كتير للبيع
( 7 )
النهاية
الحقيقة إن فـ بداية التاريخ كان فيه ليليث اتظلمت
وكل اللي جم من نسلها شالوا الخطيئة
الحقيقة
إن سعاد حسني وأم كلثوم ماتوا لوحديهم
.
النهاية
- فى عُرفنا إحنا -
متلاقيش بعدها غير بدايات
زى ما نكون فى لعبة
كل ما نجيب فيها جيم أوفر
نعمل ريستارت
هى دى اللعنة الحقيقية
كل الحكايات ملضومة ورا بعضها
و القصة مبتخلصش
الحقيقة
سعاد حسنى و أم كلثوم ماتوا
بس متنسوش
*
*
اللي باللون الغامق : لميا
واللي بالفاتح : أنا
الإهداء
إلى : لمياء محمود .. كفة الميزان اللى فيها الروح
