م الجرح الأول ف الهجرة
عمرو شاهين
م الجرح الأول ف الهجرة
كان طبيعى
ان العصافير تهرب من عيونى
و تروح تجيب الشمس
أول ما ببيع سريرى بسجارة مسروقة
بشربها من غير الرئتين ما يحسوا ..
خوفا م الألم .
كان ضرورى
ان الغربان تزورنى
اول ما بخرج انشر حلم مش فاكر ملامحه
و يدفنوه بعيد
قبل ما تطلع ريحته ..
و اتسجن جواه .
..
من بلكونة بيتنا
.. ماكنتش بشوف غير
..شوية بدل زيتى
راجعة لستات قتلها الانتظار
او طوابير كاكى ..
بيلعن عرقها يوم 17/8
وكسل شويه ابهات
حرموهم من فرصة الاعفا
البحر ..
أخر حاجة بيشوفها قزاز نضارتى
و عقلى بيشوف الضفة التانية
جبال وراها ستات عريانة
وراعى غنم وحيد
بيحب جارتى اللى فى التانى
فاكر تفاصيل الطفولة
دنيا الاطفال
ولعب الكورة فى الشارع
جون مجدى عبد الغنى
وازاى زعلت ان كابتن ماجد مش بدقن
بينى و بين طفولتى ..
حبة هدوم ا
مى مش قادرة تتهجى العلاقة
بين دموعى و شكلهم ؟
عيوبى اكبر من انها تتستر بيهم
و حلمى بعد اول خطيئة
مستحيل يلبس كافولة
كرهى للاصفر بكل درجاته
من اول الشاحب لغاية البنى
سببه حالة حصار من رملة ناعمة
مالهاش وظيفة ..
غير انها تلسعك لما تلبس شورت
و تعلمك ..
تهرب بسرعة من طفولتك ..
فتلبس البناطيل .
تقريبا انا الطفل الوحيد
اللى ماكانش بيحاول يجرح ..
شجرة النبق برعونته
يقعد تحتها
ويقتلها بتفسير العلاقة مابين
طعمه المسكّر ، لعب القطط ، الشوك ،و الجبل . 3
ساعات ،و صحرا ، وبحر ، ونفق
علشان اسيب
بخل امى فى المشاعر
كف ابويا
حلم شايل حمل بدرى
وأهاجر للبرودة
.....
بعد النفق
هناك .. الناس رطوبة
وارواحهم تلج
علشان كدة ..
استهلاكك للمناديل الورق مبقاش كتير
الزحمة بتعلمك ..
ازاى تمارس الوحدة ..
بسرية العادة
فتكتشف ان أآمن اماكن للبكا وسط البشر
و افضل ميعاد ترتكب فيه الجريمة
ساعة ادان الضهر.
واذا كان صحابك .. ب
يستمتعوا بشرب احزانك ..
قهوة سادة / شاى / حجر شيشة بدون دخان
فأنت بتستمتع بشربهم بيرة ساقعة ..
على اى ناصية .
و أحيانا بتلف حكاويهم سجاير
و تعزمهم عليها
فيقرروا يدوك مكافأة
تذكرة اوجاع هدية
و اغنية قديمة لاسمهان
البحر ، الجبل ..
صبحوا فى عينك
حلم مابتفتكرش منه غير ..
لسعته و الموج
علشان كدة قررت تحبس العصافير
وتكتب قصيدة تقول
" نقل فؤادك كيف شئت من الهوى
ما الحب إلا " للى يمسح دمعتك
