خلى بالك من امنياتك لا تتحقق .. عن ساعات الحظر و دلع الرجل نتحدث
حنان الجوهري
مين فينا مش نفسها جوزها يلزق لها ف البيت و يقعد معاها طول اليوم " بلا شغل بلا قرف خدنا منه ايه يعنى غير الضغط و بهدلة المواصلات ؟ " طالما وددنا جميعا انهم يعيوا لهم اسبوع مثلا او رجله تتكسر و يقعدوا معانا ف البيت .. قد ايه تمنينا ان ربنا يهديهم او تحديدا يهدهم و يقعدوا معانا بدل قعدة القهوة او صرمحة البيه مع صحابه .. مين فينا ما رفعتش ايديها ساعة الفجر و الاستاذ لسه ما شرفش و تدعى : " منك لله يا بعيد " من قلقها و غيظها طبعا انه عايش حياته براحته .. مين فينا ما اتمنتش ييجى يقعد معاها و الواد عيان يعمله الكمادات او يتفرج معاها ع المسلسل اللى بتحبه او حتى يقعد معاها ف المطبخ يقشر توم او يصفى الاوطة ؟ كلنا نفسنا ف كده.
ربنا استجاب الدعاء .. ربنا يبارك له السيسى و فرض علينا حظر تجوال و اجوازنا البرنسات كانوا فاكرينه حظر هزار زى اللى قبله و هينزلوا يتمشوا و كده اتفاجأوا انه بجد , يكلم صاحبه ف التليفون " أحا يا هيثم ده الحظر بجد "
هيييييييييييييييييه اهه
قعد لك .. من الساعة 7 باليل لحد ما يروح الشغل الصبح .. اول يومين هتبقى متحمسة جدا و عامله بروجرام هايل تقضوه سوا ف البيت هتبقى جايبة لزوم السهر : فشار و لب و تسالى و فاكهة و عصير و مخزنة مية ساقعة كتير و لو لزم تجيبى له سجاير .. هتعملى له الاكل اللى بيحبه بعد ما كان مش بياكل غير مرتين ف الاسبوع و ع السريع عشان ما تزعليش عشان بيبقى متعشى برة او جاى متأخر ومش هينفع ياكل طاجن البامية باللحمة الضانى بتاعتك عشان هيخش ينام لكن مع بداية فرض الحظر هتستعيدى ايام شهر العسل و قبل ما تزهقوا من بعض .. تشغلى له الاغانى اللى بيحبها و الراديو و هو معاكى ف المطبخ او و هو بيستحمى على ما تحضرى له الفطار ستمتد سعادتك لكل ساعات اليوم حتى و هو لسه ماجاش .. هتسرحى له شعره كمان و تربطى له رباط الجزمة و تنزلوا رايحين الشغل ماسكة ايده و هتبقى مبسوطة و حاسة ان جوزك رجع لك كل الوقت بييجى من الشغل عليكى هو اه مش عشان خاطر عيونك بس اهو بييجى و خلاص .. ,
يقعد على الكنبة بيهرش ف كرشه او بيطرقع صوابعه و تبدأ الطلبات بعد ما تشيلى الاكل و تغسلى المواعين : " هاتى لى بقى عصير ولا اقولك خليه شاى الاول .. هاتى لى السجاير من جوه حطى بقى الطفاية هنا جنبى كده .. ايوه , شوفى التليفون بيرن .. فين القصافة ؟ معلش غيرى لى الطفاية .. مافيش اى حاجة حلوة تتاكل .. اه حلو الرز بلبن هاتى .. فيه موز من بتاع امبارح ؟ طب كويس هاتى شوية و شوفى لى الريموت فين " و انتى رايحة جاية ولا عارفة تقعدى م الطليات ولا بتتفرجى على التليفزيون هتوصلى لمرحلة " يالا يا بن ال.... من هنا انا زهقت من م... اهلك " ده ف سرك طبعا.
و بعدين ؟ من كتر الزهق ............ ترجعى تانى للفيس بوك و تويتر و تكبرى دماغك تلاقيه و هو جاى ف الطريق بيقولك بكل حماس هناكل ايه ؟ تردى بكل رخامة ما تعرفيش جت لك منين " تقولى له بواقى اكل امبارح " .. ف الاول هيتصدم وممكن يزعق ف اول مرتين تلاتة بعد كده هيدخل ف مرحلة التكيف و هيتعود و هيحس ب " هى الولية اتغيرت ولا ايه ؟ فين الدلع ؟ " و يرجع تانى غصب عنه لبواقى الاكل لا ويجيب معاه علبة تونة احتياطى.
ايه اللى بيحصل بقى ؟ زهق .. هى الاجابة الوحيدة .. البروجرام المكتظ بيخس مع الوقت و فقرة الساحر و البالية و الزغاريد بتاخد وقتها و اللى بيزهق مش الجمهور لكن مقدم الفقرات .. هل تقديم نفس العرض كل ليلة على نفس خشبة المسرح و بنفس الافيهات و الحركات و نبرة الصوت مع كل بداية تصفيق تولد بداخل الممثل هذا الكم من الزهق و تجعله يتمنى لو لم يحضر احد ؟.
ليه اتغيرنا كده بعد كام يوم ؟ مش ده كان اسمى أمل لينا ؟ يا عزيزتى خدى بالك من امنياتك لأنها ممكن تتحقق .. كنتى عاوزاه يقعد معاكى و قعد و كتير لدرجة انك زهقتى عشان هو بييجى يتدلع و بياخد منك اهتمام .. هو كائن أنانى و عارف ده و كتير منهم بجحين و بيقولوا أه احنا انانيين .. ما اعتبرش ان الحظر ده فرسة انه هو كمان يهتم بيكى و يدلعك .. كل اللى همه الاكل و الفرجة على التلفزيون و السيكوسيكو و خلاص مش مهم انتى بقى محتاجة دلع منه و لا اهتمام .. حياتك احلى من غيره ما تتوقعيش انه هييجى يقولك عاملة ايه انهاردة ف شغلك ؟ ولا انه هيقولك خليكى انا اللى هاعمل العشا انهاردة .. هيقعد على الكنبة لدرجة انه هيجى له قرحة فراش و ينادى عليكى بكل دلع ورخامة وانتى بتغسلى المواعين " فين البسبوسة يا حبيبتى ؟ "
منك لله يا سيسى
