خاص جدا
هشام صبح
هى كده الدنيا
مادايماشى
حرف فى كلمة
كلمة فى سطر
فاكر
لما زمان كنت تقولى
:'بكره أهو جاى'
أعصر فى فكرى وأقول كلام
مبيتنطقش
وأكتم فى قلبى شوية كلام
ولا يتسمعش
أسمع قصايدك وأحسدك
دلوقتى راح فين الكلام؟
آه ياخوفى يكون خلص،
والا الحكاية،
وتر فى قلب
ماعادش بيتضرب؟
آه م الدنيا لما بتاخد فى حبالها
يمكن عشان ده
بخاف،
بخاف يقف الكلام،
لسه الوتر شغال فى قلبى
بيحرقه
ينزف كلام
بس برضه لسه
بخاف
لأصحى فى يوم الصبح
يبقى كل همى هو
السكوت
والسكوت
موت
والموت عمره مايتولد
منه الحياة
صح الحياة مليانة موت
أما الموت،هو الموت
ملوش تعريف
ملوش تصريف
ملوش محل من الكلام
خايف فى دوامة الحياة
نتحرق
وتضيع وشوشنا وتتمسخ
ومن جديد
أفرح بدوامتى
أتخطف
وماعادش قلبى يملا دنيتى
بأى كلام
