على باب النبي
أحمد سليمان
اهداء الى اعز الاصدقاء ابراهيم الجهينى
انا نفسى ازور النبى اصل القليب فاضى
وغلبت فيه اعمره بالذكر ف الماضى
يااللى بتشكى الهوى لسه القليب قاسى
ياولدى هجر الحبيب للناسى سيف ماضى
******************
فرشت توب للهوى يذكر عليه ناسى
عقدت عهد اللقا والقلب ليه ناسى
توب البعاد هدنى والوصل ترياقى
جمعت تبر الوصال وبدلته بنحاسى
******************
ما تقومى ياسيده دلينى ع الراقى
دا الرعشه بتهزنى مش ميه ف عراقى(عروقى)
ع العتبه واقف سنه والدمع مالى العين
ياللى ابتليت بلوتى شاركنى اشواقى
******************
يامغنيين اللقا قولوا الفراق على فين
الوصل غرس اتسقى طرحه اجيبه منين
يا ستنا الريسه انا ساكن العتبات
انا اللى اديلى سنه مكتوب عليه البين
******************
يا دسوقى لا تردنى وتقولى قلبك مات
لو حتى يبقى القضا الرمى بالجمرات
فاتت سنه ع السنه& صبح الشقى سنتين
راح قلبى لأم الصبى وف السكينه بات
*****************
عابد وناسك تقى وللعابدين فيه زين
رايح بقلبى الشقى وكيانى كله حنين
قلبى اللى كان يوم تقى بس الشيطان جنه
خايف عليل مبتلى اوراده اتقل دين
*****************
ياللى انته منه النبى وانته الحفيد منه
جايلك وفاض بى الجفا وعنيه ليك حنوا
ارجوك ف وقت اللقا سلملى بس عليه
دا انا عقلى سيبته ف منى طول البعاد جنه
****************
وتقولوا يا مصطفى طال البعاد كده ليه
القلب صابه الصدا اصل الشيطان كاد ليه
انا جيت له عندك هنا وبحكمه انا راضى
يا حبيبى قلبى اتعطب جايلك لترضى عليه
****************
دا انا نفسى ازور النبى بس القليب فاضى
والقلب كان مبتلى بالهجر ف الماضى
يا اللى ابتليت بلوتى دا مفيش اجل تانى
ساعة القضا يا خلق ع الكل سيف ماضى
