Document 1
أحمد أسامة
يا متعلق فـ جوف حوا
بحبل حياة
ومتكتف فـ جوف روحك
بكفن الخوف
اول سطورك للجاي
ناسي النقط
اخر سطورك ف اللي راح
اشباح حروف
وبين البين...
سفيه فــ رزين
سعيد فـــ حزين بتطوح
وهترووح عشان ترتاح
تقوم مـ النوم تلاقي حوا بتصبح
فتعشقها...وتجري تغازل التفاح
ياراحل عن خلا فكرك
لحلم براح..فـ دار تفاريح
صحيت امتى من الغفوة
وقتل الشك..
جوا الشكوى بالتلميح
وعشقك وانت بتسافر
للعب الريح ف عز سكونها بالمراجيح
مابين البين
سفيه فــ رزين
سعيد فـــ حزين بتطوح
بتوصل للسما فـ روحة.. مع قلوعك
وف الرجعة عنيك ع الارض
ودنيا فــ دين
فلا اديت المرح حقه على خشوعك
ولا أديت وقار الفرض
ولا شدك لاوطانك هبوط الروح
ولا طاير مع الاحلام بشكل صريح
ولسه الفكرة هتوديك وهتجيبك
وتتأنس بترغيبك فـ اتيانها..وترهيبك
وهتنسيك مع الدوخة فـ افلاكها
بأن الضي جاي يهديك عشان توصل...
وهيسيبك
ومنك يومها للافراح وللتباريح
========
