صندوق قديم
نادية مدني
صندوق قديم مليان حاجات أنا شلتها
وأمنيات أنا عشتها
كانت سراب
حكايات كتير
سخافات كتير
صدقتها
جمّعتها
وفتحت باب
لخداع وكدب كتير قوي
جه بعدها
صندوقي مليان ذكريات
جواه مش بس حاجة
كتير حاجات
حارميها بكرة كلها
لأنها
عنوان سذاجة قلب عاشها وحبّها
زي ما حَبّك
صدّقتها وصدّقت قلبك
وجه أوان أقفل أنا الصندوق وراك
و ارمي بقايا حاجات معاك
هي نهاية قصتي
وآخر سخافات الكتاب
