ازاي هنتصالح؟
أحمد أسامة
يامشيبة الغندور شقا
ومغيبة العصفور بحور
ومعشماهم باللقا
على طل انقاض القصور
فاكرة الوليف يقدر..
يوفي مواعيدك
رغم الجناح مكسور؟
والقلب ني اخضر..
طارح ليوم عيدك
تحت الضلوع البور؟
دا النور خفت همدان
.
.
يا فكرة الاوطان
لما التاريخ يوصف..
شريانك الفضي
يا بدعة القضبان
لما اشتهت يوسف..
للنسوة تسترضي
يا جنتي ف ارضي
والذنب مش مغفور
بحلف على البردي
فــ عشقك..شهادة زور
الرؤيا مش هيا..
والسنبلات نصين
الاولة جافة
والتاليات فاسدين
ولا عمر كيل وفى..
طول ما الميزان معطوب
طول ما الجدور ف الطين
والجذع مش منصوب
والقصة معكوسة
والحكمة بالمقلوب
اللي عصر خمره
وسقاها للوالي
صاحب مقام عالي
في عرشها المسلوب
واللي عجن قمحه
لون روحه وملامحه
هو اللي مات مصلوب
بالسبق والاصرار
.
.
سيف الخشب بتار
حالف لا ياخد تار
الشعب من ناسه...
ويشقهم نصين
يا جيش صلاح الدين
والدين ماهوش صالح
يامصلحين بالدين
العلم ف الطالح
دي المدرسة حواديت
للجاي من امبارح
جرجس مالوش صالح
كان سنة او كان فرض
جرجس نبات الارض
مش فعلها الفاضح
وازاي هنتصالح؟
وانا وانتي بنخون بعض؟
لا وقفت يوم صفك
ولا خدتي يوم صفي
انا وانتي بنصفي
حساباتنا ف المليان
رغم الميدان فاضي
غير من صدى المواويل
وسنابك الشجعان
وسراب ضفاف للنيل
بيسيل بدم شهيد
ندمان على عمره
بتنادي ع العطشان؟
بس الولد تايه
وكأنه مش منك..
ياغربة الاوطان
