منديل ورق
هاني آدم
منديل ورق
شاهد علي روحي
في آخر لحظة من الأحلام
شاهد مجروح
ضم نسيجه
دمعتها و دمعتي طير مدبوح
ده ما كانش وداع
كان تار بايت
قدري و فواتير كل آثامي
قرروا فجأة يعاقبوني عقاب
الموت أرحم منه عليه
كان كل ده ليه
و إزاي قادر
أكتب أو أعبر و أنا ميت
عدموني عشان حبيت ملكة
و حضنت الحنيه بذاتها
بإبتسامتها
بقلب بيعشق
كل مافيه
بيعشق ميت
ذنبها كان إيه
أحلم بيها
و أسرقها من الدنيا لجنه
مكتوب علي بابها أنا إختارتك
و ورا الباب عمر بيتسرق
و دموع حبيبين حلموا يغنوا
و الدنيا مارضيتش تلحن
أغنيتهم
ولا جمعتهم
ولا خلتهم
زي ما كانوا
لا بيجرحوا بعض ولا إتخانوا
ولا هيه هتقدر تغفرله
ولا يقدر يستني مكانه
و المنديل بس اللي جمعهم
علي سلم حلم و نور مقطوع
و الأصل دموع
و سفر و رجوع
شاهد علي قلب مصمم يعشق
ويكمل مشوار ممنوع
منديل ورق
شاهد عيان
علي أغرب حب
و أقوى عذاب
والمدهش فعلا كل ده ليه
و قابلتها ليه
و جرحتها ليه
مع إن الحب اللي في قلبي
عشانها إتخلق
