ح تشبه عليا
أمينة عبد الله
ح تشبه عليا أول ما تشوفنى
وتحس إنى زى خالتك اللى كنت بتعيط ف حضنها من غير كسوف
أو زى مدرسة الفصل من أولى لرابعة إبتدائى
وكأنى "فردوس محمد" خارجة عليك من فيلم أبيض وأسود على دنيا كلها ألوان فجة ...
أيوة هى ملامحى
بتشبه اسمى اللى عمرى ما كنت بحبه إلا لما سمعته من راجل حنين
اسمى كنت بستبدله وإحنا بنلعب مدرسة ب "هدى " أو "نور" من غير سبب أعرفه
مع إنى لما كبرت كرهت نفس الإسمين
اسمى كان مشبك صوابعه غصب عنى ف "سى السيد "
فاتعلمت منه رفض كل اللى ما يجيش على هوايا
وعجبنى صبر "امينه"-اللى يبان إستسلام-على عند "سى السيد" وبمنتهى الأمومة "كفاياك زفت يا سى السيد"...
صبر الأمهات ...
وحنية الخالات
وحزم الأبلاوات كلها حاجات ودعتها مع اسمى وطيبة ملامحى ...
